საქართველოს საერთაშორისო განვითარების სააგენტოს თანამშრომლები ახალციხეში გარემოსდაცვითი არასამთავრობო ორგანიზაციების წარმომადგენლებს შეხვდნენ. თამუნა უჩიძე, ახალციხე
შეხვედრა სააგენტოს მიერ განხორციელებული პროექტის - “ეკო-სამართლიანობის ცენტრების განვითარება საქართველოში” - ფარგლებში მოეწყო. მას გარემოსდაცვის კუთხით დაინტერესებული მოქალაქეები და მედიის წარმომადგენლები ესწრებოდნენ. შეხვედრის მიზანი იყო საზოგადოების ინფორმირება ორჰუსის კონვენციის შესახებ.
ორჰუსის კონვენცია არის საერთაშორისო ხელშეკრულება, რომლის სრული დასახელებაა - კონვენცია გარემოსდაცვით საკითხებთან დაკავშირებით ინფორმაციის ხელმისაწვდომობის, გადაწყვეტილებების მიღების პროცესში საზოგადოების მონაწილეობისა და ამ სფეროში მართლმსაჯულების საკითხებზე ხელმისაწვდომობის შესახებ.
“ხალხმა არ იცის იმ უფლებების შესახებ, რასაც ეს კონვენცია, აგრეთვე ჩვენი ეროვნული კანონმდებლობა გვანიჭებს”, - აცხადებს საქართველოს საერთაშორისო განვითარების სააგენტოს თავმჯდომარის მოადგილე გიორგი მაღრაძე.
მისი თქმით, მაშინ, როცა რიგი პროექტების განხილვა მიმდინარეობს, საზოგადოება პროცესებში არ ერთვება, შემდეგ კი გაკეთებული პროექტები აღარ მოსწონთ: “ამიტომ გვინდოდა, რომ ადგილობრივი არასამთავრობო ორგანიზაციებისთვის და დაინტერესებული მხარეებისთვის ეს ინფორმაცია მიგვეწოდებინა”.
ორჰუსის კონვენციის გაცნობის შემდეგ, შეხვედრის მონაწილეებმა რეგიონში არსებული ეკოლოგიური პრობლემების შესახებ იმსჯელეს.
“განსაკუთრებით წყლის ხარისხისა და ნარჩენების მართვის საკითხები გამოიკვეთა. ამ რეგიონში ყოველთვის პრობლემაა ხე-ტყის უკანონო ჩეხვაც”, - ამბობს გიორგი მაღრაძე.
მისივე განმარტებით, პროექტის მიზანი არასამთავრობო ორგანიზაციებთან კავშირების დაამყარებაა: “არის საკითხები, რომლებიც ადგილზე უნდა გადაიჭრას და არის საკითხები, რომლებიც ცენტრალურ დონეზე უნდა გადაწყდეს. მხოლოდ ერთმანეთის დახმარებით შევძლებთ თუნდაც ამ რაიონში იმ ეკოლოგიური პრობლემების მოგვარებას, რომლებიც საზოგადოებას მრავალი წელია, აწუხებს”.
არასამთავრობო ორგანიზაციების წარმომადგენლების განცხადებით,
გარემოსდაცვით საკითხებზე ნებისმიერი შეხვედრა ნებისმიერ დროს ძალიან მნიშვნელოვანია.
“გაჩნდა ახალი იდეები, რომლებზეც შეიძლება პროექტები დაიწეროს”, - ამბობს გარემოსდაცვითი არასამთავრობო ორგანიზაცია “აწყურის” თავმჯდომარე ნანა ნათენაძე.
საქართველოს საერთაშორისო განვითარების სააგენტოს თანამშრომლები ახალციხეში გარემოსდაცვითი არასამთავრობო ორგანიზაციების წარმომადგენლებს შეხვდნენ. 
No comments:
Post a Comment
დატოვე კომენტარი