მასწავლებელთა სერთიფიცირება დაიწყო

13 ივლისს მასწავლებელთა სასერთიფიკაციო გამოცდები დაიწყო. პირველი გამოცდა პედაგოგებს პროფესიულ უნარებში ჩაუტარდათ.

სასერთიფიკაციო გამოცდები საქართველოს მასშტაბით ყველა საგამოცდო ცენტრში ტარდება. მასში მონაწილეობას დაახლოებით 14 000 პედაგოგი იღებს.

ახალციხის საგამოცდო სერვის ცენტრში პროფესიული უნარების გამოცდა ორ სესიად ჩატარდა. პირველ სესიაზე რეგისტრაცია 345-მა პედაგოგმა გაიარა. თუმცა 92 მათგანი გამოცდაზე არ გამოცხადდა. ხოლო მეორე სესიაზე 334 მასწავლებლიდან, გამოცდა მხოლოდ 117-მა ჩააბარა.
მომდევნო გამოცდა 19 ივლისს ქართულ ენასა და ლიტერატურაში ჩატარდება. ახალციხის საგამოცდო ცენტრის ადმინისტრატორის გელა ინასარიძის თქმით, გამოცდისთვის 179- მა პედაგოგმა გაიარა რეგისტრაცია.

“20 ივლისს მათემატიკის გამოცდა იქნება, ხოლო 21, 22 და 23 – ში უცხო ენის გამოცდები ჩატარდება”, - ამბობს გელა ინასარიძე.

სერთიფიკატის მისაღებად თითოეულ გამოცდაში პედაგოგმა მაქსიმალური ქულის 60 პროცენტზე მეტი უნდა დააგროვოს. პროფესიული უნარებისა და საგნობრივი ტესტების მაქსიმალური ქულა შემდეგნაირად განისაზღვრა: პროფესიული უნარების ტესტი - 80 ქულა; ქართული ენისა და ლიტერატურის ტესტი – 80 ქულა; უცხო ენების ტესტი – 120 ქულა; მათემატიკის – 70 ქულა.

სასერთიფიკაციო გამოცდები ნებაყოფლობითია და 2014 წლამდე ყველა პედაგოგმა უნდა ჩააბაროს. მხოლოდ სერთიფიცირებულ მასწავლებლებს გაეზრდებათ ხელფასი, შეეძლებათ მენტორმასწავლებლებად მუშაობა და “ასწავლე საქართველოსთვის” პროგრამაში ჩართვა, რაც მაღალმთიან და ეთნიკურ უმცირესობებით დასახლებულ რეგიონებში მუშაობას გულისხმობს.

ის მასწავლებლები, რომლებიც 60 პროცენტიან ბარიერს ვერ გადალახავენ, მუშაობას ჩვეულებრივად გააგრძელებენ და სასერთიფიკაციო გამოცდების ჩაბარების შესაძლებლობა 2014 წლამდე რამდენჯერმე მიეცემათ.

თამარ თოთაძე, ახალციხე.