სამშენებლო სეზონი იწყება

მიმდინარე წელს სამცხე-ჯავახეთში ათი ახალი პროექტის განხორციელება დაიწყება. თითქმის ათი მილიონი ლარი კვლავ გზებისა და წყალ-კანალიზაციის სისტემების რეაბილიტაციისთვის გაიხარჯება.

 თამუნა უჩიძე, ახალციხე 

31 მარტს ახალციხეს საქართველოს რეგიონული განვითარებისა და ინფრასტრუქტურის მინისტრის მოადგილე ლაშა გოცირიძე და მუნიციპალური განვითარების ფონდის აღმასრულებელი დირექტორი კონსტანტინე მგელაძე ესტუმრნენ. შეხვედრა სამხარეო ადმინისტრაციაში გაიმართა და მას რწმუნებულის აპარატის წარმომადგენლებთან ერთად, რეგიონის მუნიციპალიტეტების გამგებლებიც ესწრებოდნენ. მედიისთვის დახურულ კარს მიღმა ხელისუფლების წარმომადგენლებმა მიმდინარე პროექტებთან დაკავშირებული პრობლემები, ასევე 2010 წელს განსახორციელებელი პროექტები განიხილეს.

 წელს საქართველოს მუნიციპალური განვითარების ფონდი სამცხე-ჯავახეთში ათ პროექტს განახორციელებს, რომელთა საერთო ბიუჯეტიც 9,2 მილიონ ლარს შეადგენს. აქედან 1,400 ათასი ლარი ახალციხის, 500 ათასი ვალეს, 1,400 ათასი ახალქალაქის, 1,500 ათასი ადიგენის (კონკრეტულად, სოფელ უდისთვის), 570 ათასი სოფელ ბოლაჯურის, 500 ათასი ნინოწმინდის, 600 ათასი ასპინძის, 1,400 ათასი კი ბორჯომის შიდა ქუჩებისთვისაა გათვალისწინებული.

 თანხის ნაწილი მოხმარდება წყლ-კანალიზაციის სისტემის რეაბილიტაციასაც. 600 ათასი ლარით ნინოწმინდაში სპანდარიანისა და ჰოვსეფიანის ქუჩებზე საკანალიზაციო და სასმელი წყლის მილები შეიცვლება. ასპინძის მუნიციპალიტეტის სოფლებში ნიჯგორსა და აწყვიტაში კი სასმელი წყლის ქსელი მოეწყობა.

 პროექტებს დააფინანსებს საქართველოს მთავრობა, მუნიციპალური განვითარების ფონდი, აზიის განვითარების ბანკი (ADB) და მსოფლიო ბანკი.

 “მაისისთვის უკვე ტენდერში გამარჯვებული კომპანიები გამოვლენილი იქნება და პროექტებზე მუშაობაც დაიწყება”, - ამბობს კონსტანტინე მგელაძე.   

 ლაშა გოცირიძის თქმით, რეგიონში პროექტების განხორციელება  არამხოლოდ ინფრასტრუქტურის გაუმჯობესების თვალსაზრისითაა მნიშვნელოვანი: “თითოეულ პროექტზე არაერთი ადგილობრივი მოქალაქე დასაქმდება, ოჯახებს შემოსავალი გაუჩნდებათ”.

 შეხვედრაზე კონსტანტინე მგელაძემ ადგილობირვი ხელისუფლების წარმომადგენლებს გაერთიანებული წყალმომარაგების კომპანიის ხელმძღვანელი პირები გააცნო: “წყალმომარაგების კომპანია დაახლოებით ისეთივე სქემით მიდის, როგორც წავიდა ენერგეტიკა 2004-2005 წლებში. რაიონებში წყლის საკითხებთან დაკავშირებით იგივე პრობლემებია, როგორც ეს გასულ წლებში ენერგეტიკაში იყო”. 

 მგელაძის განცხადებით, წყალმომარაგების საკითხები ადგილზევე მაქსიმალურად მოკლე ვადაში და ეფექტურად უნდა გადაწყდეს. “ამ თვალსაზრისით ხშირად ისეთ ფაქტებთან გვავქს საქმე, როგორიცაა გულგრილობა, არაკომპეტენტურობა. ხშირ შემთხვევაში პირდაპირ კორუფციული სქემებია აწყობილი, - ამბობს მგელაძე და დასძენს, რომ წყალმომარაგების სფეროში სერიოზული ინსტიტუციური რეფორმები გატარდება, - რაც გარკვეულწილად შეიძლება მტკივნეულიც იყოს”.