“მესხეთის” მორიგი გამარჯვება

27 აპრილს ახალციხის საფეხბურთო გუნდ “მესხეთმა” ლაგოდეხის “ჰერეთს” უმასპინძლა. თამაში “მესხეთის” გამარჯვებით, ანგარიშით 3:0 დამთავრდა. 

ლაგოდეხის “ჰერეთმა”, რომელიც ახალციხის “მესხეთს” ჯგუფში ერთი ქულით უსწრებდა, მოწინააღმდეგის კარში გოლის გატანა ვერ შეძლო.

“ჰერეთი” ჩვენი უშუალო კონკურენტი იყო. ამ გამარჯვებით უკვე ორი ქულით გავასწარით”, - ამბობს ახალციხის “მესხეთის” მთავარი მწვრთნელი პაატა გოგოლაძე.

ლაგოდეხელების კარში სამი უპასუხო გოლი ზურა სუდაძემ, დიმა ლეკიშვილმა და დათო ინასარიძემ გაიტანეს.

წინა თამაში “მესხეთმა” მარცხით დაასრულა. მარტვილის “მერანმა”, რომელიც ჯგუფში მეექვსე ადგილზეა, ახალციხის გუნდს 2:1 აჯობა.

“ბიჭებმა კარგად ითამაშეს, მაგრამ მსაჯმა არ დაგვინდო და ორი თერთმეტმეტრიანი პენალტი დანიშნა”, - ამბობს პაატა გოგოლაძე.  

ახალციხის საფეხბურთო გუნდს პირველი ლიგის მეორე წრეზე ოთხი თამაში აქვს დარჩენილი. თბილისის “35-ე საფეხბურთო გუნდსა” და ტყიბულის “მეშახტესთან” გასვლითი თამაშებია დაგეგმილი. ხოლო ბათუმის “დინამოსა” და ფოთის “კოლხეთს” “მესხეთი” საკუთარ მოედანზე უმასპინძლებს.

თამარ თოთაძე, ახალციხე