ბავშვთა სახლი გაუქმების ზღვარზე

სოფელ ტაშისკარში არსებული ბავშვთა სახლი, რომელიც ექვს ათეულ წელს ითვლის, შესაძლოა გაუქმდეს.

ამორტიზებული საცხოვრებელი, სასწავლო და სასადილო კორპუსები; ჩამსხვრეული მინები; მოუწესრიგებელი სველი წერტილები; დამტვრეული მერხები; გასარემონტებელი საკლასო ოთახები. ეს იმ გარემოს აღწერაა, სადაც 19 მზრუნველობა მოკლებული ბავშვი ცხოვრობს. თუმცა, შესაძლოა, მალე მათ ეს გარემოც აღარ ჰქონდეთ. არ არის გამორიცხული, ის ბავშვთა სახლები, რომლებიც გარკვეულ სტანდარეტებს ვერ აკმაყოფილებენ, საერთოდ გაუქმდეს.

“სახელმწიფო მცირე ზომის, საოჯახო ბავშვთა სახლებზე აკეთებს აქცენტს, სადაც ოჯახურ პირობებში 7-8 ბავშვი იცხოვრებს და იქნებიან ცოლ ქმარი რომლებიც მათ ყურადღებას მიაქცევენ”, - ამბობს დირექტორი და აქვე ამატებს, “სახელმწიფო ზრუნვის საგენტოსთან გასაგზავნ, 2011 წლის მოთხოვნაში, ჩავწერთ, რომ ჩაუტარდეს ბავშვთა სახლს რემონტი, თუმცა რა პასუხი მომივა არ ვიცი”.

დირექტორს იმედი აქვს, რომ ბავშვთა სახლი არსებობას გააგრძელებს და მოხუცთა თავშესაფრად არ გადაკეთდება.

“აქ სოციალურად დაუცველი ოჯახების შვილები ცხოვრობენ. იმ ოჯახების,   რომელთაც ბავშვების რჩენის საშუალება არ აქვთ”, - გვიხსნის იგი.

სოფელ ტაშისკარში, ორ ჰექტარ მიწის ნაკვეთზე, მზრუნველობამოკლებულ ბავშვთა სახლის სასწავლო, საძინებელი და სასადილო კორპუსები 1950 წელს აშენდა. ბავშვთა სახლი 400 მზრუნველობამოკლებულ ბავშვზე იყო გათვლილი. ამჟამად დაწესებულებაში 19 აღსაზრდელია. თუმცა, 2010 წლის 1 იანვრამდე, ვიდრე ბავშვების რეინტეგრაცია და გაშვილება მოხდებოდა, ტაშისკარის ბავშვთა სახლში 52 აღსაზრდელი ცხოვრობდა.  

ტაშისკარის ბავშვთა სახლის ფილიალის დაფინანსება ცენტრალიზებულია და მზრუნველობამოკლებული ბავშვების კვებისა და ჩაცმის ხარჯებს სახელმწიფო ზრუნვის საგენტო უზრუნველყოფს.

  

“წლების განმავლობაში ბავშვებს ტელევიზორი არ ჰქონდათ, საგენტო შემპირდა, რომ სატელიტურ ანტენებს შეგვიძენს,”- ამბობს ბავშვთა სახლის დირექტორი და დასძენს, რომ კვების მხრივ ბავშვთა სახლს პრობლემები არ აქვს.

ბავშვთა სახლის აღსაზრდელები ხაშურის მუნიციპალიტეტში მდებარე დაბა ქვიშხეთის საჯარო სკოლაში სწავლობენ.

“ადრე ბავშვთა სახლი დახურული ზონა იყო და მზრუნველობამოკლებული ბავშვები აქვე დადიოდნენ სკოლაში. ამჟამად ბავშვთა სახლში მხოლოდ წრეებია, დაინტერესებულ ბავშვებს შეუძლიათ ისწავლონ კომპიუტერი, მუსიკა, სტილისტობა. ლიტვის საელჩოს დაფინანსებით შევიძინეთ მინანქრის გამოსაწვავი ღუმელი და ბავშვები მუშაობენ თექაზე და მინანქარზე”, - ამბობს დირექტორი.

ნატალია კოპაძე, ბორჯომი