საახალწლო სუფრა

 ახალქალაქის ქართულ და სომხურ ოჯახებში გაშლილი საახალწლო სუფრები ერთმანეთისგან თითქმის არ განსხვავდება, თუმცა, ამ ოჯახებში ახალი წლის აღნიშვნის თავისებურებები მაინც არის.

ახალქალაქის სომხურენოვან ოჯახებში, ძირითადად,  უამრავი სხვადასხვანაირი კერძითა და სალათით. ამასთან, ყოველი სუფრა ორ – სომხურ და ქართულ სამზარეულოს აერთიანებს.

გაზეთი “სამხრეთის კარიბჭე” ორ ოჯახს ესტუმრა, სომხურსა და ქართულს, რომლებიც ახალ წელს თავიანთი ტრადიციებით აღნიშნავენ.

 ჟამქოჩიანი საახალწლო მზადებას დღესასწაულამდე რამდენიმე დღით ადრე იწყებს, რადგან გასაკეთებელი ბევრი აქვს. მის ოჯახში ექვსი წევრია და დიასახლისის მომზადებული სხვადასხვა კერძი ყველას გემოვნებას ესადაგება. წლევანდელი საახალწლო სუფრა წინა წლის სუფრებისგან მხოლოდ სპეციალურად მისი სიახლისთვის შეძენილი ახალი ჭურჭლით განსხვავდება. კერძები კი იგივე იქნება. დიასახლისი საცივს, ხაჭაპურს, ტოლმას ვაზის ფოთოლში, სამარხვო ტოლმას, ქადას, “ბერაკსა” და ფახლავას ამზადებს.   

თამრიკო ნადირაძეც დღესასწაულამდე რამდენიმე დღით ადრე იფარებს წინასაფარს, რადგან უამრავი კერძი აქვს მოსამზადებელი, როგორც სომხური, ისე ქართული სამზარეულოდან. თუმცა ახალქალაქელები ქართულსა და სომხურ სამზარეულოს უკვე აღარც ასხვავებენ. თამრიკო ნადირაძის ოჯახში საახალწლო სუფრაზე იდება საცივი, ფხალეული, გოზინაყი, ტოლმა, ხაჭაპური, ქადა და ფახლავა. ამ ოჯახში სადღესასწაულო სუფრა ტოლმის გარეშე ვერ წარმოუდგენიათ, თანაც ტოლმას ვაზის ფოთოლშიც აკეთებენ და კომბოსტოშიც. თამრიკოს საახალწლო სუფრაზე ფელმუშიც ექნება, რასაც სომხური ოჯახის სადღესასწაულო სუფრაზე ჯერჯერობით ვერ შეხვდებით.

ჟამქოჩიანების ოჯახში ნაძვის ხეს 25 დეკემბერს რთავენ, სათამაშოებსა და განათებას ყოველწლიურად აახლებენ. სახლი იკებანებით ირთვება. თამარა ნათესავებისთვის სუვენირების ყიდვასაც აპირებს, ეს იქნება წლევანდელი წლის ზოდიაქოს გამოსახულება – კურდღელი სტაფილოთი. ჟამქოჩიანების ოჯახში განსაკუთრებულ მნიშვნელობას 2 იანვარს (ე.წ. ბედობის დღეს) ანიჭებენ.

“ყოველ წელს, 2 იანვარს აუცილებლად ვამზადებ “ტარის” (ჩვეულებრივი ორცხობილა, რომელშიც მონეტა იდება). ოჯახის წევრები ორცხობილას ნაჭერ-ნაჭერ ტეხავენ და ინაწილებენ. ვისაც მონეტიანი ნაჭერი შეხვდება, ჩვეულების თანახმად, ამ წელიწადში ოცნებები აუხდება და მომავალი წელი მისთვის ბევრი კარგის მომტანი იქნება”, - ამბობს თამარა ჟამქოჩიანი.

შარშან მონეტა ვაჟიშვილს შეხვდა და მისი თქმით, წელიწადი მართლაც კარგი იყო. ჟამქოჩიანების ოჯახს საახალწლო ნიშნების სჯერა და ამიტომაც მათ ზედმიწევნით დაცვას ცდილობს.

ახალი წლის პირველ დღეს ორივე - სომხური და ქართული ოჯახები მოუთმენლად ელიან პირველ სტუმარს, რადგან მთელი წლის განმავლობაში მათი კეთილდღეობა ამ ადამიანზეა დამოკიდებული. თუმცა ქართულ ოჯახებში პირველ სტუმარს- მეკვლეს განსაკუთრებულად ხვდებიან - ტკბილეულობითა და თხილეულობით სავსე ტომარაზე სვამენ. ხშირად ოჯახი მეკვლეს წინასწარ ირჩევს. ტრადიციულად, ასე აკეთებს თამრიკო ნადირაძის ოჯახიც.

“ადამიანმა, ვისაც ავირჩევთ, პირველმა უნდა შემოაღოს ჩვენი სახლის კარი. მეკვლე ყოველთვის ჩემი ბიძაშვილი იყო და ყოველთვის კარგად ყოფნას გვაბედებდა”, - ამბობს თამრიკო ნადირაძე.

ყველა ცდილობს კარგად შეხვდეს ახალ წელს, რათა ის ბედნიერად გაატაროს. დაე, მუდამ ახდეს ორთავე – სომხური და ქართული ოჯახებისა და ყველა ეროვნების ადამიანთა ოცნებები და მოლოდინები! გილოცავთ დამდეგ ახალ წელს!

შუშან შირინიანი, ახალქალაქი