ინკლუზიური განათლება ძლიერდება

მანანა სარაშვილი, ახალციხე

ინკლუზიური განათლების დანერგვისა და ხელშეწყობის მიზნით, სამი დღის განმავლობაში, ახალციხის მეშვიდე საჯარო სკოლის პედაგოგებს ტრენინგები უტარდებოდათ.

სპეციალური საგანმანათლებლო საჭიროების მქონე მოსწავლის შეფასება, ქცევის მართვა, სწავლების ეფექტური სტრატეგიები, ადაპტირებული გაკვეთილები, ინდივიდუალური სასწავლო გეგმის შედგენა-განხორციელება, მიზნების გაწერა, მულტიდისციპლინური გუნდის წევრის და სკოლის გარემოს შემზადება - ის ძირითადი თემებია, რომელიც ახალციხის მეშვიდე საჯარო სკოლის პედაგოგებმა და აღმზრდელებმა გაიარეს.

აღნიშნული ტრეინინგები განათლებისა და მეცნიერების სამინისტროს მასწავლებელთა პროფესიული განვითარების ეროვნული ცენტრის და ფედერაცია “გადავარჩინოთ ბაშვების” ხელშეწყობით ჩატარდა.

მასწავლებელთა პროფესიული განვითარების ეროვნული ცენტრის ტრენერთან ერთად, ტრეინინგებს ამავე ცენტრის მიერ არჩეული, ახალციხის მეშვიდე საჯარო სკოლის სამი პედაგოგიც ატარებდა.

“მაისში მოგვიწია როგორც თბილისის ასევე რეგიონების სპეციალური სკოლების პედაგოგებთან მუშაობა. ინკლუზიური განათლების დანერგვისა და ხელშეწყობის მიზნით ამ სკოლებიდან უნდა ამოგვერჩია კონსულტანტი მასწავლებლები. სათანადო მომზადების შემდეგ კონსულტანტი მასწავლებლები კუნსულტირებას გაუწევენ როგორც საკუთარი, ასევე რეგიონში არსებული ზოგადსაგანმანათლებლო სკოლების მასწავლებლებს სსსმ მოსწავლეთა განათლების საკითხებში”, - ამბობს მასწავლებელთა პროფესიული განვითარების ეროვნული ცენტრის ტრენერი ეკატერინე სეთურიძე.

მოტივაცია-დაინტერესება, პრეზენტაბელურობა, აქტიურობა, ჩართულობა და შემაჯამებელი ტესტის შედეგები – ის კრიტერიუმებია, რომელთა გათვალისწინებითაც შეირჩნენ   კონსულტანტები. მათ შორის მეშვიდე საჯარო სკოლის პედაგოგი მანანა იაძე.

“თბილისში გავიარეთ ინტენსიური ტრენინგი. იქ ვისწავლეთ განვითარების დარღვევები, მათი სწავლების სტრატეგიები, ბავშვის საგანმანათლებლო საჭიროების შეფასება, ინდივიდუალირი სასწავლო გეგმის შედგენა, გაკვეთილის დაგეგმვა განსხვავებული საჭიროებების მქონე მოსწავლეებისათვის”, - ამბობს იგი.

პროექტის ფარგლებში ტრეინინგების პირველი ეტაპი მიმდინარე წლის ივნისში ჩატარდა.

“ამ პერიოდში მოხდა განვითარების სხვადასხვა დარღვევების გაცნობა, თითოეული ბავშვის უნარების შესწავლა, გავიგეთ რა პრობლემები ქონდა თითოეულ ბავშვს, რის მიხედვითაც დავიწყეთ მუშაობა, - ამბობს ეკატერინე სეთურიძე და აქვე ამატებს, რომ მესამე ეტაპი მიმდინარე თვიდან დაიწყება: ტრეინინგების ჩატარება დაგეგმილია უკვე ზოგადსაგანმანათლებლო სკოლებშიც. იქ სადაც უკვე დაწყებულია ინკლუზიური განთლება”. 

ინკლუზური განათლება უკვე მიმდინარეობს ახალციხის მეხუთე საჯარო სკოლაში, ვალის პირველ საჯარო სკოლასა და სოფელ კლდის საჯარო სკოლაში.

“ზოგადსაგანმანათლებლო სკოლა აუცილებლად უნდა იყოს მზად ინკლუზიური განათლების დანერგვისთვის. მზად უნდა იყოს ადმინისტრაცია, მოსწავლე, მშობელი, თვითონ ის ბავშვიც”, - ამბობს სეთურიძე.

ანალოგიურად ფიქრობს ახალციხის მეშვიდე საჯარო სკოლის დირექტორი ლალი კარკაძე (სკოლა სპეციალური პროფილის მქონეა და იქ მხოლოდ სპეციალური საგანმანათლებლო საჭიროების მქონეა). მისი თქმით, მსგავსი ტრეინინგები საქართველოს ყველა საჯარო სკოლაში უნდა ჩატარდეს: “დღეს სსსმ მოსწავლე შეიძლება ჩაირიცხოს და სწავლობდეს ნებისმიერ სკოლაში. აქედან გამომდინარე, სასურველია რაც შეიძლება მეტ სკოლაში იყვნენ შესაბამისად მომზადებული მასწავლებლები”.  

დღეის მდგომარეობით, მეშვიდე საჯარო სკოლაში 32 აღსაზრდელისწავლობს. სკოლა საბაზოა და 17 პედაგოგი და 9 აღმზრდელი მუშაობს. აღნიშნული ტრენინგები ყველა მათგანმა გაიარა.

ეკატერინე სეთურიძის თქმით, მომავალი წლიდან შესაძლებელია ანალოგიური ტრეინინგები კიდევ გაგრძელდეს და მასში მონაწილეობა მიიღონ როგორც საჯარო სკოლის პედაგოგებმა, ასევე მოსწავლეებმა და მშობლებმა.