იმპორტირებული კარტოფილი – შედეგების შეფასება

აღუნიკ აივაზიანი, ახალქალაქი

  

6 ოქტომბერს სოფელ კიროვაკანში კარტოფილის იმპორტირებული ჯიშების მოსავლის შედეგები შეაფასეს.

სათესლე კარტოფილი, რომელიც წელს ფერმერებმა დარგეს, ჰოლანდიური კომპანია AGRICO-ს დახმარებითაა იმპორტირებული. კომპანია ახალქალაქში 6 წელია მუშაობს და ამ დროში სხვადასხვა ჯიშის გამოცდა მოხდა. კარტოფილის აღების პროცესს კომპანიის წარმომადგენლები და ჰოლანდიიდან, თბილისიდან და ახალქალაქიდან ჩამოსული სტუმრები ესწრებოდნენ. ტრაქტორმა სხვადასხვა ზომისა და რაოდენობის კარტოფილი ამოთხარა, თუმცა, ერთმნიშვნელოვანი პასუხი, როგორ შეიძლება წლევანდელი მოსავლიანობის შეფასება, არ არის.

მსხვილი ფერმერი ვარდ ოგანისიანი ამბობს, რომ მოსალოდნელი შედეგის მიღებას კლიმატურმა პირობებმა შეუშალა ხელი: “დაახლოებით 20 ჰექტარზე მქონდა დათესილი, ჯერ მხოლოდ ნაწილი ავიღე. სათესლე ჯიშებით კმაყოფილი ვარ. იმ ადგილებში, სადაც სეტყვა არ ყოფილა, შედეგი კარგია”.

ამ მოსაზრებას ახალქალაქის სერვის ცენტრის მენეჯერი სერგეი შახბექიანიც იზიარებს: “პირველ წელს, “მერსი ქორფის” პროგრამის ფარგლებში, 25 ტონა კარტოფილით დავიწყეთ. პროგრამის დახურვის შემდეგ სერვის-ცენტრმა დამოუკიდებლად გააგრძელა მუშაობა. წელს 150 ტონა სათესლე კარტოფილი ჩამოვიტანეთ და მივყიდეთ ფერმერებს, რომლებმაც საჭირო ჯიშები წინასწარ შეგვიკვეთეს. ვერ ვიტყვით, რომ რომელიმე კონკრეტულმა სახეობამ უფრო გაამართლა, რადგან ყოველი ჯიში სხვადასხვა მიწაზე, წელს და კლიმატურ პირობებში სხვადასხვა შედეგს იძლევა. ჩვენს რაიონში ყველაზე მეტად გავრცელებულია: მარფონა, აგრია, პიკასო, არინდა, არნობა. ამ ჯიშებს მოსახლეობა აქტიურად იყენებს”.

მისი თქმით, მუნიციპალიტეტში კარტოფილის ახალი ჯიშების დანერგვამ მოსავლიანობა საგრძნობლად გაზარდა: “თუ ადრე 20 ტონა ნორმალურ შედეგად მიიჩნეოდა, დღეს 1 ჰექტარზე საშუალოდ 45-50 ტონას იღებენ, რაც შესანიშნავი შედეგია“.

საქართველოში კომპანია AGRICO-ს წარმომადგენელი დათო შერვაშიძე ამ პროცესს მარკეტინგული კუთხით მომგებიანად, ხარისხობრივი თვალსაზრისით კი შედეგიანად მიიჩნევს: “ამ ჯიშების პოტენციალი მაღალია, რადგან ასეთი მოსავალი მივიღეთ. მათ მომავალი ნამდვილად აქვს. ახალციხიდან 18 ჯიში ჩამოვიტანეთ. მარკეტინგული თვალსაზრისით ეს ჯიშები ნორმალურად იყიდება”.

კომპანიას სათესლე და სუფრის კარტოფილი მოჰყავს და მის ექსპორტს მსოფლიოს 80-ზე მეტ ქვეყანაში ახორციელებს. წლიურად კომპანიაში დაახლოებით მილიონ ტონა კარტოფილს აწარმოებენ, რომლის ნახევარი სათესლეა, მეორე ნაწილი კი სუფრის.

“ესაა ჯიშები, რომლებიც ხშირ წვიმებსა და ძლიერ ტენიანობას კარგად უძლებს და არ ავადდება”, - ამბობს კომპანია AGRICO-ს ჰოლანდიელი წარმომადგენელი იან ტეგერი.

ახალქალაქის მუნიციპალიტეტის საკრებულოს თავმჯდომარის, ჰამლეტ მოვსესიანის თქმით, პროგრამა კარგ შედეგს იძლევა, თუმცა, მოსახლეობა იმპორტირებულ სათესლე კარტოფილს ვერ ყიდულობს: “მოხარული ვარ, რომ ეს პროგრამა ჩვენს რაიონში მუშაობს და კარგ შედეგს იძლევა. ჩემი თხოვნა იქნება, სათესლე კარტოფილი გლეხებს იაფად მიყიდონ, რადგან 1 კილოგრამ სათესლე მასალაში 1,5 ან 2.5 ლარის გადახდის შესაძლებლობა გლესებს არ აქვთ. ჩვენ გვაქვს პროგრამა, რომლის ფარგლებშიც ახალქალაქში ჩიფსების დამამზადებელი ქარხნის აშენებას ვგეგმავთ და პრეზიდენტთანაც მოლაპარაკებული ვართ”.

იან ტეგერმა საპასუხოდ განაცხადა, რომ კომპანია მთავრობასთან ერთად ამ მიმართულებით მუშაობს და შედეგები ახალ სეზონზე იქნება.