თამუნა უჩიძე, ადიგენი
რატომ დააკავეს ადვოკატი მოგებული საქმის შემდეგ
თაღლითობა, სასჯელი მოგებული სასამართლო პროცესის სანაცვლოდ თუ სხვის თავისუფლებას შეწირული ადვოკატი; 5 ოქტომბერს, პატიმრობაში მყოფი ადვოკატის ტარიელ მურმანიშვილის მხარდასაჭერად, ადიგენის მუნიციპალიტეტის სოფელ წახანში აქცია გაიმართა.
ტარიელ მურმანიშვილი სისხლის სამართლის კოდექსის 180-ე, თაღლითობის მუხლით, 9 სექტემბერს დააკავეს და წინასწარ პატიმრობაში იმყოფება.
“სოფლის მოთხოვნაა, გამოძიება სწრაფად დაასრულონ და მალე გამოუშვან”, - აცხადებენ ტრანსფარანტებით ხელში სოფლის ცენტრში შეკრებილი თანასოფლელები.
ტარიელ მურმანიშვილმა თბილისის სახელმწიფო უნივერსიტეტის სამართალმცოდნეობის ფაკულტეტი დაათავრა და ადიგენის რაიონულ პროკურატურაში სტაჟიორ-გამომძიებლად მუშაობდა. აქედან გენერალურ პროკურატურაში განსაკუთრებულ საქმეთა საგამოძიებო განყოფილებაში გადაინაცვლა. სხვადასხვა დროს იყო პროკურორის თანაშემწე და გამომძიებელიც. მოგვიანებით მან პროფესიულ საქმიანობა დედაქალაქში, დიდუბე-ჩოღურეთის რაიონის პროკურორად გააგრძელა. თუმცა, 2007 წელს, საბოლოოდ დატოვა პროკურატურა და დაკავებამდე ადვოკატურაში მუშაობდა.
“ტარიელი მოგებული სასამართლო პროცესის გამო დააკავეს. ადვოკატს სოდში მისი დაცვის ქვეშ მყოფმა, ანა ბალამწარაშვილმა უჩივლა. იგი ხე-ტყის ბიზნესში იყო ჩართული და მილიონნახევრის დაბრუნება უნდოდა”, - გვიამბობს დაკავებულის ბიძაშვილი ზურა მურმანიშვილი.
მოგების შემთხვევაში ბალამწარაშვილი ადვოკატს მოგებული თანხის ნახევარს დაჰპირდა. მურმანიშვილმა ამ პირობის ნოტარიული აქტით დამოწმება მოითხოვა და გააფორმა კიდეც. სასამართლო პროცესის შემდეგ კი ბალამწარაშვილმა თავის მიერ ხელმოწერილ დოკუმენტზე განაცხადა, რომ ხელი ისე მოაწერინეს მისი პირობები წაკითხული არ ჰქონდა.
“მურმანიშვილი თაღლითობის ბრალდებით მხოლოდ და მხოლოდ ბალამწარაშვილის ჩვენების საფუძველზე დააკავეს. ამ ქალბატონს მოგების შემდეგ ადვოკატისთვის საზღაურის მიცემა არ უნდოდა. სასამართლოზე პროკურატურას არცერთი მტკიცებულება არ ჰქონდა, ორ-სამ დღეში შევაგროვებთო”, - ამბობს ზურა მურმანიშვილი.
ყველაფერი კი იქიდან დაიწყო, რომ 2007 წელს ბელგიის მოქალაქე ემილ ლეოპოლდ ლუი რენიერსმა ბალამწარაშვილის რჩევით გადაწყვიტა საქართველოს ხე-ტყის ბიზნესში რამდენიმემილიონიანი ინვესტიცია განეხორციელებინა. მან სამცხე-ჯავახეთში 2 700 000 ლარის ღირებულების
ტყით სარგებლობის ლიცენზია მოიპოვა და 1 500 000 გადაიხადა კიდეც. 1 200 000 ლარის გადასახდელად კი საქართველოში პარტნიორი, ბიზნესმენი ზურაბ ადამია მოძებნა. მათ შპს “თისელი” დაარსეს. თუმცა, ადამიამ ხელშეკრულებით ნაკისრი ვალდებულები დააღვია და რენიერსს 1 200 000 ლარი არ გადაუხადა. ამის გამო საქართველოს მთავრობამ მას ხე-ტყით სარგებლობის ლიცენზია შეუწყვიტა. 2010 წელს რენიერსმა ლიცენზია აღიდგინა, თუმცა, აღმოჩნდა, რომ ტყის მასივის 75 პროცენტი გაჩეხილი იყო. რენიერსმა მთავრობას წინადადებით მიმართა – შვიდი სატყეო უბნიდან სამის თანხა გადახდილი მაქვს, დანარჩენი ოთხი წაიღეთ და სამი დამიტოვეთო. ამ შეთავაზებაზე მან უარი მიიღო. უფრო მეტიც საქართველოს მთავრობამ მეორედ აღდგენილი ლიცენზია ისევ გაუუქმა. რენიერსმა საქართველოში ადვოკატის ძებნა ამის შემდეგ დაიწყო და მურმანიშვილს დაუკავშირდა. მან კი 2011 წლის 29 აპრილს, სასამართლოს გადაწყვეტილებით, ზურაბ ადამიას რეინიერსის სასარგებლოდ 1 230 000 ლარზე მეტის გადახდა დააკისრა. მოგებული პროცესის შემდეგ, მურმანიშვილმა დაცვის ქვეშ მყოფს საზღაურის გადახდა მოსთხოვა.
დაკავებულის ინტერესებს სასამართლოში საადვოკატო ბიუროს ერთ-ერთი პარტნიორი ზაქარია ქუცნაშვილი იცავს: “რეინერსის წარმომადგენელს ბალამწარაშვილს ტყის უკანონო ჭრის გამო ხელი აქვს მოწერილი მთელ რიგ ჭრის აქტებზე, რადგან ხე-ტყის ლიცენზიის მფლობელი გასცემს ჭრის ნებართვას, ამიტომ, რამდენადაც ვიცი, ახალციხის პროკურატურაში მის მიმართ გამოძიებაც დაიწყო. გათავისუფლების სანაცვლოდ მან სოდს თანამშრომლობა და ვიღაც-ვიღაცეების დაჭერა შესთავაზა. მურმანიშვილიც სწორედ ამ საქმეს ემსხვერპლა”.
ქუცნაშვილის თქმით, ბალამწარაშვილი ვერაფერს ამბობს, თუ რატომ არ უნდა მიეღო მოგებული პროცესის შემდეგ გასამრჯელო ადვოკატს.
მურმანიშვილის თანასოფლელები ადვოკატის უდანაშაულობაში დარწმუნებული არიან.
“მისი ცუდი არავის გაუგია. რაც შეგვეძლება ყველაფერს გავაკეთებთ მის გასათავისუფლებად”, - ამბობს თემურ ვახტანგიშვილი.
მურმანიშვილის მამიდა ციალა ინასარიძე ფიქრობს, რომ გამოსავალი პრეზიდენტამდე ხმის მიწვდენაა: “ამ სოფელმა ორჯერ მისცა ხმა მიხეილ სააკაშვილს და მესამედაც მას დავუჭერთ მხარს. ამიტომ უნდა იცოდეს რას ამბობს ხალხი აქ. სირცხვილია ტარიელისნაირი ადამიანების ციხეში ჯდომა”.
მურმანიშვილის სასამართლო სხდომა პირველ ნოემბერს უნდა გაიმართოს. თუმცა, მანამდე შესაძლოა ადვოკატის მხარდასაჭერი აქცია წახნელებმა დედაქალაქშიც მოაწყონ.
