არსებობენ თუ არა უცხოპლანეტელები?

თამუნა უჩიძე, ახალციხე

შესაძლებელია სხვა პლანეტაზეც იყოს ისეთი ცივილიზაცია, 
რომ როგორც ჩვენ ქალაქიდან ქალაქში დავფრინავთ,
 ისე მათ პლანეტიდან პალნეტაზე შეეძლოთ გადაადგილება,
 მაგრამ ამის შანსი ძალიან ნაკლებია.

მედია საშუალებებით გავრცელებული ინფორმაცია დედამიწაზე უცხოპლანეტელების შესაძლო ჩამოსვლის შესახებ; რამდენად დასაშვებია, რომ ორ თვეში მფრინავი ობიექტები მართლაც მოგვიახლოვდნენ;

სადეზინფორმაციო სააგენტო Weeklyworldnews.com-ის მიერ გავრცელებული ინფორმაციით, დედამიწას უცხოპლანეტელთა სამი გიგანტური ხომალდი უახლოვდება. სტატიის თანახმად, მფრინავი ობიექტების მოახლოებასთან დაკავშირებით SETI–ის (Search for ExtraterrestrialIntelligence) მეცნიერებიც საუბრობენ: “ნასას არ უნდა ინფორმაციის გასაჯაროება, მაგრამ გაეროსა და სხვადასხვა ხელისუფლებებისთვის ცნობილია, რომ უცხოპლანეტელთა ვარსკვლავთმფრენები დედამიწისკენ მოემართებიან”.

ამავე სააგენტოს მიერ გამოქვეყნებული დოკუმენტებით დასტურდება ნასასა და ამერიკის ხელისუფლების გეგმები უცხოპლანეტელთა ხომალდებთან ბრძოლის შესახებაც.

სააგენტოს ინფორმაცია არაერთმა საიტმა აიტაცა. პრესა.ჯე-ს თანახმად, “წინასწარი გათვლებით, ჩვენამდე უცხოპლანეტელები დაახლოებით ორ თვეში მოაღწევენ”.

“სამხრეთის კარიბჭე” უცხოპლანეტელების თემაზე რამდენიმე მეცნიერს ესაუბრა. სიცოცხლე სხვა პლანეტებზეც რომ არსებობს, თითქმის, ყველა ერთხმად თანხმდება. თუმცა, გავრცელებულ ინფორმაციას, მფრინავი ობიექტების მოახლოების შესახებ, სხვადასხვაგვარად ხსნიან.

“გადაჭრით ვერაფერს ვიტყვი. რა თქმა უნდა, შესაძლებელია სხვა პლანეტაზეც იყოს ისეთი ცივილიზაცია, რომ როგორც ჩვენ ქალაქიდან ქალაქში დავფრინავთ, ისე მათ პლანეტიდან პალნეტაზე შეეძლოთ გადაადგილება, მაგრამ ამის შანსი ძალიან ნაკლებია, - ამბობს ფიზიკის მეცნიერებათა დოქტორი გიორგი მესხი, რომელიც საქართველოში ნასას მიერ ჩატარებულ კვლევებში ჩართული არაერთხელ ყოფილა – დედამიწა რამდენიმე ათასწლეულს ითვლის, მაგრამ, დღემდე, არცერთ მემატიანეს ის თვალით არ უნახავს”.

საწინააღდეგოს ამტკიცებს საქართველოს საინჟინრო აკადემიის ბიოელექტრო განყოფილების წევრი, მეცნიერებათა დოქტორი და ჟურნალ “ფენომენის” რედაქტორი გიგლა გობეჩია, რომელიც ამ სფეროს 30 წელიწადზე მეტია იკვლევს და უახლოეს მომავალში წიგნსაც გამოსცემს, სახელწოდებით - “საქართველო და მფრინავი თეფშები”: “ამ მიმართულებით კვლევა პირლველად საბჭოთა კავშირის მასშტაბით სტალინმა დაიწყო. ეს მას შემდეგ, რაც ამერიკაში, ნიუმექსიკოს შტატში მოხდა, - მფრიანვი ობიექტი ავარიული დაეშვა და დაიმსხვრა”.

რაც შეეხება უცხოპლანეტელების საქართველოსთან კავშირს, გობეჩია ყველაზე გახმაურებულ ფაქტს იხსენებს, რომელიც მინსკში, ბორისოვას აეროპორტში, 1984 წლის 7 სექტემბერს, გამთენიისას, მოხდა: “ტალინი-ლენინგრადი-თბილისი-ბათუმის რეისი ტალინიდან გამოფრინდა, იგივე მარშრუტით ოღონდ ბათუმი-თბილისი-ლენინგრადი-ტალინი გაფრინდა ბათუმიდანაც. ადგილი, სადაც თვითმფრინავებს ერთმანეთისთვის გვერდი უნდა აევლოთ, 11 კილომეტრის სიმაღლეზე, ცილინდრის ფორმის განათებლი უშველებელი ლაინერი გამოჩნდა და ისე კაშკაშებდა, რომ როგორც შემდგომ ბორისოვას აეროპორტის დისპეჩერი ჰყვებოდა, დედამიწაზე კენჭებიც კი გაირჩეოდა”.    

ბორისოვას აეროპორტიდან გაცემული ბრძანებით, ერთ-ერთმა თვითმფრინავმა მიმართულება ოდნავ შეცვალა და განათებულ ობიექტს მიუახლოვდა. ამ დროს კაბინაში მყოფმა მფრინავებმა საშინელი დასხივება მიიღეს, უვნებელი მხოლოდ ერთ-ერთი მათგანი გადარჩა, რადგან ის ამ ყველაფერს კაბინიდან არ ადევნებდა თვალყურს.

“ჩემი თვალით მაქვს ნანახი მედიცინის მეცნიერებათა დოქტორის ციციშვილის დასკვნა, სადაც წერია, რომ მფრინავმა გოცირიძემ მიიღო გამოუცნობი ეტიოლოგიის დასხივება. მას ძვლები დაეფშვნა და რამდენიმე თვეში გარდაიცვლა. მეორე მფრინავი, რომელიც გადარჩა ნასამ წაიყვანა და დღემდე იკვლევენ, მესამე კი რუსეთში გადაიხვეწა და ჩემთან საუბრისას ამ ამბავს ახლაც შიშით იხსენებს”, - გვიამბობს გობეჩია.

მისი თქმით, ამ ამბის შესახებ, მაშინ მსოფლიო პრესა წერდა. თუმცა, მსოფლიო საავიაციო ინდუსტრია არ იცნობდა ისეთ ობიექტს, რომელიც ამ სიმაღლეზე, თანაც ასეთი მოცულობის, გაჩერებას შეძლებდა.

გობეჩია ამბობს, რომ უცხლოპლანეტელები ენერგეტიკულად საინტერესო ადგილებში ჩნდებიან და მათ არა მხოლოდ ცუდის გაკეთება შეუძლიათ: “ისინი მოდიან იმ შემთხვევაში, როდესაც დედამიწას რაღაც უჭირს. მაგალითად, უკრაინაში, ჩერნობილის ავიაკტარსტროფის შემდეგ უამრავმა ადამიანმა ნახა სამი ობიექტი უკრაინის ცაზე გაჩერებული. რადიაციულმა ფონმა იმ დროს სერიოზულად დაიწია, ეს დოკუმენტურად აღწერა ფიზიკოსმა ვალერი კრატოხვილმა”.

გიორგი მესხი მიიჩნევს, რომ ასეთი ფაქტების შესახებ ინფორმაცია სენსაციების მოყვარული ადამიანების მიერაა გავრცელებული. 

რაც შეეხება იმას, რომ ორ თვეში დედამიწაზე უცხოპლანეტელები მოვლენ, გობეჩიაც უარყოფს. თუმცა არა იმიტომ, რომ ეს რეალურად შეუძლებელია: “მათ მოახლოებას ორი და სამი თვე სჭირდებაო ამბობენ. ეს არ არის ქარიშხალი საბრინა, ან კატარინა ამერიკას რომ უახლოვდება და ზემოდან უყურებენ. ვიკილიქსი სწორედ მანდ “იჭედება”, მფრინავ ობიექტებს თავიანთი ბაზებიდან გამოსვლა და დედამიწამდე მოახლოება წამებში შეუძლიათ”.

მესხი გობეჩიას არც აქ ეთანხმება და აცხადებს, რომ მეცნიერებს შეუძლიათ დაადგინონ მოძრავი სხეულის მიმართულება და ტრაექტორია. ამდენად, შესაძლოა განისაზღვროს ის როდის სად აღმოჩნდება.

აბასთუმნის ასტროფიზიკური ობსერვატორიის თანამშრომელი გივი ქიმერიძე აცხადებს, რომ არაა გამორიცხული გავრცელებული ამბავი სიმართლეს შეესაბამებოდეს. თუმცა, თავად ობსერვატორიაში 40 წელიწადზე მეტია მუშაობს და ტელესკოპს მსგავსი რამ არასდროს დაუფიქსირებია: “თუ წერტილოვანი რაღაცა გაივლის ცაზე, ვერავინ გაიგებს ის ასტეროიდია, უცხოპლანეტელი თუ რაიმე სხვა”.

რამდენად შეიძლება გავრცელებული ამბავი სიმართლეს შეესაბამებოდეს, ორი თვის განმავლობაში განსჯის საგნად დარჩება. ამასობაში, შესაძლოა, გარკვეული განცხადება გაერთიანებული ერების ორგანიზაციაშიც კი გაკეთდეს. გაერომ უცხოპლანეტელების საკითხთან დაკავშირებით ოფიციალური წარმომადგენლობა შექმნა.