მშენებლობები გეგმის გარეშე

 თამუნა უჩიძე, ახალციხე

ქალაქში მიმდინარე მშენებლობების მიუხედავად,
ქალაქის განაშენიანების გეგმა არ არსებობს.

მშენებლობების ბუმი ახალციხეში და ექვსი ათეული წლის წინ შედგენელი ქალაქის განაშენიანების გეგმა. არსებობს თუ არა სქემა, რომლის მიხედვითაც ქალაქში არაერთი სამშენებლო პროექტი ხორციელდება.

ქალაქში შემოსასვლელმა გზამ მიმართულება შეიცვალა, თამარაშვილის ქუჩაზე, საპატრულო პოლიციის შენობის გვერდით სავაჭრო ცენტრი “სმარტი” და ბენზინგასამართი სადგური შენდება, მის გვერდით ფუნდამენტი ჩაეყარა იუსტიციის სახლის მშენებლობასაც, ქალაქის ცენტრიდან თამარაშვილის ქუჩაზე გადადის აგრარული ბაზარი და მასთან ქალაქის ნაწილის დასაკავშირებლად მდინარე ფოცხოვზე ხიდიც შენდება.


 მიმდინარეობს ახალციხის ციხის რეაბილიტაცია და მის გარშემო ინფრასტრუქტურა ციხის რეკონსტრუქციის საბოლოო ვარიანტის განსაზღვრის შემდეგ შეიცვლება, - ეს მხოლოდ ნაწილია იმ პროექტების, რომლის მიხედვითაც ორ წელიწადში ქალაქმა იერსახე უნდა შეიცვალოს. თუმცა ეს ისე, რომ ქალაქის განაშენიანების გენერალური გეგმა, ფაქტობრივად, არ არსებობს. რუქა რომლის მიხედვითაც ადგილობრივი თვითმმართველობა ხელმძღვანელობს გასული საუკუნის 50-იან წლბში შეიქმნა და უკანასკნელი 30 წლის განმავლობაში მის განახლებაზე არავის უზრუნია.

“ქალაქის განაშენიანების ყველაზე დიდი გეგმა 1950 წელსაა შედგენილი. მის მიხედვით გენგეგმა 1970 წელსაც შეადგინეს და მასზე სოფლების განაშენიანების შესახებაც დაიტანეს ინფორმაცია”, - ამბობს ახალციხის მუნიციპალიტეტის გამგეობის კულიტურისა და ძეგლთადაცვის სამსახურის სპეციალისტი რევაზ ანდღულაძე.

ახალციხის მუნიციპალიტეტის საკრებულოს თავმჯდომარის მალხაზ გიქოშვილის განცხადებით, ბოლოს ქალაქის განაშენიანების გენერალური გეგმაში ჩასწორება 1985 წელს მოხდა: “მაშინ ქალაქის გამგებელი ვიყავი. ფაქტობრივად, 90-იანი წლების შემდეგ 2005 წლამდე ახალციხეში არც არაფერი აშენებულა, პირიქით, რაც იყო ისიც დაინგრა”.

ახალციხის მუნიციპალიტეტის საკრებულოს წევრისა და კონსერვატიული პარტიის სამცხე-ჯავახეთის რეგიონული ორგანიზაციის თავმჯდომარის ოლეგ სანდროშვილის თქმით, კომუნისტების შემდეგ ქალაქში ბევრი რამ შეიცვალა: “არაერთმა შენობამ ფუნქცია დაკარგა, შემდგომ იმ ადგილებმა სხვა დატვირთვა მიიღო და მის მიმდებარედ დასახლებებიც გაჩნდა”.

ახალციხის მუნიციპალიტეტის საკრებულოს საპროცედურო საკითხთა ეთიკის კომისიის თავმჯდომარე ზურა ჭელიძე ამბობს, რომ ნახაზზე დატანილი პარკების ადგილზე ამჟამად კორპუსებია. ეს კი იმან გამოიწვია რომ 80-იანი წლებიდან ქალაქში სპონტანური მშენებლობები დაიწყო. ასე გაჩნდა, მაგალითად, საბარგო სადგური და ზარზმელის ქუჩა, ეგრეთ წოდებული “ადინაცეტები”: “ამდენად გენგეეგმას, რომელიც 50 წლის წინაა მიღებულია, ქალაქისთვის არანაირი მნიშვნელობა აღარ აქვს”.

ქალაქში მიმდინარე მშენებლობებმა კი განაშენიანების გენერალური გეგმის შექმნა დღის წესრიგში დააყენა.

“ახალციხე უთავბოლოდაა გაშენებული, ამიტომ ბევრი რამის შეცვლა გვიხდება. მაგალითად, ახლა, ქალაქში პარკირების გაკეთებას ვგეგმავთ”, - ამბობს გიქოშვილი.

ახალციხის მუნიციპალიტეტის გამგეობის ეკონომიკისა და ინფრასტრუქტურის განვითარების სამსახურის წამყვანი სპეციალისტი მშენებლობისა და სივრცითი მოწყობის საკითხებში დავით ჩაჩანიძე ამბობს, რომ გენგეგმის შექმნის შემთხვევაში ქალაქში მშენებლობებისათვის ნებართვის გაცემა გამკაცრდება: “ახალციხე ზონებად დაიყოფა, იქნება სარეკრეაციო, ასევე სამრეწველო ზონა. კერძო სახლების მშენებლობისთვის ცალკე ადგილი გამოიყოფა. მაგალითად, ტბაზე ინფრასტრუქტურა ტურისტებისთვის მოეწყობა, ამდენად, მასთან ახლოს, მაგალითად, რაიმე სამრეწველო ობიექტის მშენებლობაზე ნებართვა აღარ გაიცემა”.

ქალაქის განაშენიანების გეგმის შესაქმნელად გიქოშვილის თქმით 300-400 ათას ლარამდეა საჭირო: “მომავალი წლის ბიუჯეტზე მუშაობა დავიწყეთ და გენგეგმის შესახებ ვმსჯელობთ. მისი დაფინანსება ადგილობრივი სახსრებით შეუძლებელია, ამ თანხას მოძიება სჭირდება”.

იმას, რომ გენგეგმის შექმნას ახალციხის მუნიციპალიტეტის ბიუჯეტი ვერ გაწვდება საფინანსო-საბიუჯეტი სამსახურის უფროსი გაგა ივანიძეც საუბრობს. თუმცა, მისი თქმით, ეს საკითხი მომავალი წლის ბიუჯეტზე მუშაობისას ჯერ არ განხილულა.

სანდროშვილის განცხადებით კი ერთ წელში აღნიშნული საკითხის გადაწყვეტა შეუძლებელი იქნება, მით უფრო რთული ეს მომავალი წლისთვისაა, რადგან 2012 საარჩევნო წელია, გენგეგმის შექმნა კი ისეთი საქმეა, რომელსაც ვერავინ დაინახავს. ამდენად, ის პიარისთვის არ გამოადგებათ და შესაბამისად, დიდი თანხა მისთვის არც გამოიყოფა: “მას ელექტრონული ვერსიის გაკეთებაც დასჭირდება. ამასთანავე ეს ისეთი ფულია, რომელიც ადგილობრივი ბიუჯეტიდან უნდა გაიცეს. მაგრამ, როცა შემოსავლები მილიონამდე არ გაქვს, მხოლოდ მაგ საქმისთვის ნახევარმილიონს ვერ დაგეგმავ”.

არქიტექტორის სულიკო გაგუას განცხადებით, გენგეგმა არის კანონი, რომლის მიხედვითაც ქალაქი შენდება და თუ მისი შექმნა დიდ თანხებთანაა დაკავშირებული, მაშინ შედარებით ნაკლები ხარჯებით სქემის შედგენა შეიძლება: “ამისათვის მხოლოდ სპეციალისტის მიწვევა გახდება საჭირო. გეგმის არარსებობის შემთხვევაში კი ქალაქის განაშენიანება ქალაქის არქიტექტორის ცოდნასა და გამოცდილებაზეა დამოკიდებული”.

რამდენად სწორად და ქალაქში არსებული არქიტექტურის შესაბამისად იცვლის იერსახეს ახალციხე, ან რამდენად სწორადაა გაცემული ნებართვა ამა თუ იმ ობიექტის მშენებლობისთვის, ეს კითხვები ღიად რჩება. რაც შეეხება იმას, თუ რამდენად დაიწყება საარჩევნო წელს გენგეგმაზე მუშაობა, სულ რამდენიმე თვეში გაირკვევა.