სამხატვრო სკოლა ახალი პროექტებით

 თამარ თოთაძე, ახალციხე

ახალციხის სამხატვრო სკოლისა და მეექვსე საჯარო სკოლის მოსწავლეები თიხასა და კერამიკულ ნაწარმზე მუშაობასთან ერთად, ოქრომჭდლობასა და მინანქარზე მუშაობასაც შეისწავლიან.

 

ახალციხის სამხატვრო სკოლაში მოსწავლეთა რაოდენობა ყოველწლიურად იზრდება. მიმდინარე სასწავლო წელს სკოლამ 65 ახალი მოსწავლე მიიღო და ოთხი პარალელური კლასი გაიხსნა. მოსწავლეები ხელოვნების სხვადასხვა დარგებს ეუფლებიან: ფერწერას, გრაფიკას, კომპოზიციას, ხეზე კვეთას, თაბარშირზე მუშაობას და ასე შემდეგ.

წელს სკოლაში ახალი პროექტის განხორციელება დაიწყო, რომელიც ამერიკის შეეერთებული შტატების საელჩომ საქართველოში 5 000 ლარით დააფინანსა და სამცხე-ჯავახეთში მეთუნეობა-კერამიკის ხელობის აღდგენას ითვალისწინებს. პროექტის ფარგლებში, პირველ ეტაპზე თბილისადან მოწვეული სპეციალისტი, კერამიკოსი თადეოზ ივანიძე სამხატვრო სკოლის პედაგოგებს და უფროსი კლასის მოსწავლეებს მეთუნეობის პროფესიას შეასწავლის. ახალციხის სამხატვრო სკოლის დირექტორმა და პროექტის ავტორმა ნანა ნათენაძემ სკოლაში კერამიკული ღუმელი და შესაბამისი აღჭურვილობა უკვე შეიძინა.

სამხატვრო სკოლის მასწავლებელი ზურა ინასარიძე ფიქრობს, რომ მეთუნეობა საკმაოდ რთული პროფესიაა: “თავიდან ძალიან გამიჭირდა თიხაზე მუშაობა. საჭიროა ცენტრის დაჭერა, რეგულირება. უნდა იფიქრო რა სისწრაფით ატრიალო და ფორმა როგორ ამოიყვანო. შესაბამისად დაძაბული ხარ, ხოლო როცა დაძაბული ხარ კარგად არ გამოგდის. რომ შევეჩვევი, უფრო გამიადვილდება და შევეცდები ეს საქმე მოსწავლეებსაც შევაყვარო”.

ნანა ნათენაძე ახალციხის მეექვსე საჯარო სკოლაში ხელოვნების მასწავლებელია. მისი იდეა იყო, რომ ამავე სკოლის ბავშვებს ოქრომჭედლობა და ტიხრულ მინანქარზე მუშაობა ესწავლათ. ამერიკის შეერთებული შტატების საელჩომ საქართველოში ეს პროექტიც დააფინანსა. ექვსთვიანი პროექტისთვის 6 500 ლარი გამოიყო. ამ თანხაში მხოლოდ შესაბამისი მასალისა და აღჭურვილობის შეძენაა გათვალისწინებული. სკოლაში უკვე შეიძინეს მინანქრის გამოსაწვავი ღუმელი. პროექტი სექტემბრიდან დაიწყო და მეექვსე სკოლის მოსწავლეები და მასწავლებლები არიან ჩართული. მინანქარზე მუშაობას მათ კოტე რაზმაძე ასწავლის.

“ბავშვებს უნდა მივცეთ საშუალება, თავად გააკეთონ ნამუშევრები, ღუმელში გამოწვან და შემდეგ, თუ სურვილი ექნებათ, რეალიზაცია გაუკეთონ, - ამბობს ნანა ნათენაძე და ამატებს, რომ პროექტის მთავრი მიზანია ყველა ბავშვს ჰქონდეს პროფესია: განათლების სისტემაში მიმდინარე რეფორმების შედეგად შეიძლება ატესტატი ყველამ ვერ მიიღოს. აუცილებელი არ არის ყველა უმაღლეს სასწავლებელში აბარებდეს. ჩვენ ბავშვებს ვაძლევთ საშუალებას გარკვეული პროფესიები შეარჩიონ და შეისწავლონ”.

სამხატვრო სკოლის მოსწავლეები მონაწილეობას სხვადასხვა გამოფენებსა და ღონისძიებებშიც იღებენ. 21 ოქტომბერს სკოლამ ხულოს სამხავრო სკოლის პედაგოგებისა და მოსწავლეების ნამუშვრების გამოფენას უმასპინძლა.  

“მომავალ წლის გაზაფხულზე მიწვეულები ვართ ხულოს სამხატვრო სკოლაში. გამოფენაზე მინანქარს, ფერწერას, გრაფიკას, კერამიკასა და სხვადასხვა ნამუშევრებს წავიღებთ. ასევე, წარმოდგენილი გვექნება მასწავლებლების ნამუშევრებიც. ვფიქრობ, რომ საკმაოდ ფართომასშტაბიანი და საინტერესო გამოფენა იქნება”, - ამბობს სამხატვრო სკოლის დირექტორი.