ახალციხელი სტუდენტების ნოუ-ჰაუ

თამარ თოთაძე, ახალციხე

1 ნოემბერს ახლციხის სახელმწიფო სასწავლო უნივერსტეტში სტუდენტური ინტერნეტ გაზეთის - jav.ge- ს პრეზენტაცია გაიმართა.

ახალციხის სახელმწიფო სასწავლო უნივერსტეტის ჟურნალისტიკის სპეციალობის სტუდენტებმა ახალი პროექტი განახორციელეს. პროექტი სპეციალიზებულ ვებგვერდს წარმოადგენს, რომელიც სამცხე-ჯავახეთის რეგიონული სტუდენტური ინტერნეტ-გაზეთის შექმნას გულისხმობს.

ვებგვერდის საშუალებით სტუდენტები რეგიონში მიმდინარე სიახლეებსა და არსებულ პრობლემებს გააშუქებენ. საიტზე განთავსდება ექვსივე მუნიციპალიტეტიდან მიღებული სხვადასხვა ინფორმაცია.

 პროექტის იდეა ჟურნალისტიკის სპეციალობის მესამე კურსის სტუდენტებს ეკუთვნის. ახალციხის სახელმწიფო სასწავლო უნივერსტეტის ასოცირებული პროფესორის გიგლა გობეჩიას ხელმძღვანელობით, სტუდენტებმა პროექტზე მუშაობა მიმდინარე წლის გაზაფხულიდან დაიწყეს.

“იდეა მას შემდეგ გაჩნდა, რაც უნივერსტეტის სტუდენტური ჟურნალის -  “სტუდენტობა და სხვა”, გამოცემა შეწყდა. ჟურნალის მხოლოდ რამდენიმე ნომერი გამოვიდა. დავიწყეთ ფიქრი რა გაგვეკეთებინა, რომ ჩვენი სათქმელი გვეთქვა”, - ამბობს ჟურნალისტიკის სპეციალობის მესამე კურსის სტუდენტი და სარედაქციო ჯგუფის წევრი არჩილ ყოლბაია.

ჟურნალისტიკის სპეციალობის სტუდენტებმა ინტერნეტ-გაზეთის შექმნის იდეა პროექტის სახით ჩამოაყალიბეს და უნივერსტეტის ადმინისტრაციას გააცნეს.

“პრეს-კლუბის შეხვედრაზე, უნივესტეტის ადმინისტრაციის ხელმძღვანელმა ნოდარ გოროხოვმა გვითხრა, რომ უნივერსტეტი დააფინანსებდა ნებისმიერ სტუდენტურ წამოწყებას, რომელიც მათთვის საინტერესო იქნებოდა”, - იხსენებს ჟურნალისტიკის სპეციალობის მესამე კურსის სტუდენტი ნინო ზედგინიძე.

პროექტის ღირებულება ხუთი ათასი ლარით განისაზღვრა. ამ თანხით სტუდენტებმა საიტისთვის საჭირო ტექნიკური საკითხები მოაგვარეს. პროექტის ფარგლებში ახალციხის სახელმწიფო სასწავლო უნივერსტეტის ორივე კორპუსში მონიტორი დამონტაჟდა. სადაც სიახლეები, განცხადებები, საინტერესო ინფორმაციები, უნივერსტეტის მიერ განხორციელებული პროექტებისა და საიტის პრომო ვიდეო-რგოლები განთავსდება.   

სტუდენტურ ინტერნეტ გაზეთს გიგლა გობეჩიასთან ერთად სარედაქციო ჯგუფი ხელმძღვანელობს, რომელიც ორ კვირაში ერთხელ იცვლება. კორექტურასა და რედაქტირებაში სტუდენტებს ჟურნალისტიკის სპეციალობის ლექტორები ნანა ტალახაძე და შორენა გაბოშვილი ეხმარებიან.

“მართალია, იდეის ავტორები ჩვენ ვართ, თუმცა, ეს გაზეთი მხოლოდ ჟურნალისტიკის სპეციალობის სტუდენტებისთვის არ არის. ყველა სტუდენტს, ვისაც სურვილი ექნება, შეუძლია საიტზე ინფორმაცია განათავსოს”, - ამბობს ჟურნალისტიკის მესამე კურსის სტუდენტი და სარედაქციო ჯგუფის წევრი ოთარ აწყურელი.

ახალციხის სახელმწიფო სასწავლო უნივერსტეტის ასოცირებული პროფესორი გიგლა გობეჩია ინტერნეტ გაზეთის მნიშვნელობაზე საუბრობს და ამბობს, რომ სტუდენტები თეორიული ცოდნის გარდა პრაქტიკულ ცოდნასაც მიიღებენ.

“ელექტრონული მედია ბეჭდურ მედიას ვერ ჩაანაცვლებს. უბრალოდ ინტეგრაცია, მათი შერწყმა და გათავისება ისე უნდა მოხდეს, რომ საზოგადოება, რომელიც ინფორმაციას ეძებს, მის გარეშე არ დარჩეს, - ამბობს გიგლა გობეჩია და ამატებს, რომ სტუდენტები თითქმის ყველა საინტერესო თემაზე იმუშავებენ, გარდა პოლიტიკისა: პოლიტიკა იმდენად რთულია, განსაკუთრებით საქართველოში, რომ არ მინდა ბავშვები ამ მიმართლებით დაკავდნენ”.

პროექტის თანაავტორები ფიქრობენ, რომ პროექტი აუცილებლად გაამართლებს თუ სტუდენტები აქტიურად იქნებიან ჩართული ინტერნეტ გაზეთის მომზადებაში, ინფორმაციის მოძიებაში და შემდეგ საიტზე განთავსებაში.