გადატვირთული პირველკლასელები

აღუნიკ აივაზიანი, ახალქალაქი

წლევანდელ სასწავლო წელს ინგლისური ენა პირველივე კლასიდან ისწავლება. ახალქალაქელი პირველკლასელები სამ ენას –ქართულს, ინგლისურსა და სომხურს ერთდროულად სწავლობენ. რომელ ენას უკეთ აღიქვამენ პატარები და რას ფიქრობენ ახალ სასწავლო სისტემაზე მშობლები და ინგლისური ენის სპეციალისტები.

 

წელს ინგლისური ენის სწავლება პირველივე კლასიდან დაიწყო. საქართველოს არაქართულენოვან სკოლებში პირველი კლასიდანვე  ისწავლება ქართული ენაც. გამოდის, რომ ქართულ სკოლებში პირველკლასელები ორ ენას, არაქართულ სკოლებში კი ერთდროულად სამ ენას სწავლობენ.

პატარა ნორაირი სულ ორი თვეა, რაც სკოლაში დადის. იგი ჩივის, რომ მეგობრებთან სათამაშოდ დრო აღარ რჩება, თუმცა, უხარია, რომ მისალმება, დამშვიდობება და კიდევ ბევრი რაიმეს თქმა უკვე ინგლისურად და ქართულადაც შეუძლია.

“დილას სკოლაში მივდივარ, მერე სახლში ვბრუნდები, ვსადილობ, შემდეგ ინგლისურის გაკვეთილზე მივდივარ, იქიდან რომ მოვდივარ, ვმეცადინეობ და უკვე ღამდება”, - ამბობს იგი.

ნორაირის დედის ჰერო ჰოვჰანისიანის თქმით, პირველკლასელებს სამი ენის ერთად სწავლა ძალიან უჭირთ: “ბავშვი სწავლობს, რასაც დავალებად აძლევენ, მაგრამ სამი ენის ერთად სწავლა ძალიან რთულია. ინგლისური მეორე კლასში მაინც დაეწყოთ. ჩემი შვილი ვერ ასწრებს, რჩება და იძულებული ვარ, ინგლისური ინდივიდუალურადაც ვასწავლო. სანამ ერთ ენას მეცადინეობს, მეორე ავიწყდება ან ყველაფერს ერთმანეთში ურევს.

პირველკლასელი ლუსინეს მამა ბავშვების გადატვირთვის თაობაზე იგივე აზრისაა. ამასთან, არმენ ფარმანიანის თქმით, კომპიუტერულ პროგრამებში სომხური ენაც უნდა იყოს, თორემ არსებობს საფრთხე, რომ ბავშვები მშობლიურ ლიტერატურულ ენას ვერ აითვისებენ: “სომხური ელემენტები ძალიან ძნელია, თანაც ინგლისურ და ქართულ ენებს ახალი მეთოდით ასწავლიან, რომელიც ბავშვისთვის ძალიან სახალისოა. შედეგად კი ბავშვი სომხურ ენაში ჩამორჩება. სექტემბერსა და ოქტომბერში სახლში დიდი აურზაური იყო, ქალიშვილს სომხურის სწავლა არ უნდოდა, იგი კომპიუტერით ხელში დადიოდა და მშობლიური ენის სწავლას ვაიძულებდით”.

ენის სპეციალისტები პირველი კლასის პროგრამაში ინგლისური ენის ჩართვას მთლიანობაში დადებითად აფასებენ. მათი თქმით, ინგლისური ენის გაკვეთილები პირველკლასელებისთვის ძალიან საინტერესოდ მიმდინარეობს. მასწავლებლებს თან ნოუთბუქები დააქვთ, რადგან პირველი კლასის ინგლისურის გაკვეთილებზე კომპიუტერული ოთახი ყოველთვის თავისუფალი არ არის. ახალი მეთოდი კი გულისხმობს დისკების გამოყენებას, რომლიდან დათვალიერებული ფერადი სურათებით და ანიმაციებით ბავშვები ენას ძალიან კარგად ითვისებენ. მასწავლებლების თქმით, ინგლისურის გაკვეთილებზე ყოველთვის სასიამოვნო აჟიოტაჟია და ბავშვებიც გამოცოცხლებული არიან.

თუმცა ამ მეთოდს მინუსებიც აქვს. ინგლისურის მასწავლებელი მელანია აივაზიანი ამბობს, რომ პირველ კლასში ინგლისურის სწავლას ის ართულებს, რომ მოსწავლემ ჯერ კარგად მშობლიური ლიტერატურული ენაც არ იცის.

“ზეპირ სწავლებაში ჯერჯერობით ყველაფერი კარგად მიდის, წერითში კი ცოტა რთული სიტუაციაა. პირველი კლასიდანვე ინგლისურის სწავლას გამართლებულად არ მივიჩნევ, ბავშვმა ჯერ მშობლიური ენა უნდა ისწავლოს, რათა შემდეგ უცხო ენის სწავლისას მშობლიური დაეხმაროს. მაგალითად, ვწერ სიტყვა “გოგონას” ინგლისურად, გვერდით იგივე სიტყვა სომხური ასოებით უნდა მივუწერო, პირველკლასელმა კი სომხურიც არ იცის კარგად”, - ამბობს მელანია აივაზიანი.