დაპირებული ხიდი

მანანა სარაშვილი, ახალციხე

ერთი თვეა, ასპინძის ქუჩის მიმდებარე ტერიტორიაზე, სამშენებლო სამუშაოები მიმდინარეობს. მდინარე ფოცხოვზე გადასასვლელი ხიდის, გზისა და ნაპირსამაგრ სამუშაოებზე სამი სამშენებლო კომპანია მუშაობს.

მდინარე ფოცხოვზე გადასასვლელი საცალფეხო ხიდი, რამდენიმე წლის წინ, გაზაფხულზე მოვარდნილმა, ადიდებულმა მდინარემ წაიღო. აღნიშნული ხიდით ყველაზე ხშირად ასპინძის ქუჩისა და ეგრეთ წოდებული, ივერიის ბინის მოსახლეობა სარგებლობდა. ცხადია, ხიდის გაკეთებით ყველაზე მეტად აღნიშნული დასახლების მოსახლეობა იყო დაინტერესებული. გასულ წელს, ადგილობრივი თვითმართველობის არჩევნების დროს, წინასაარჩევნოდ მოსახლეობასთან შეხვედრისას, ახალციხის მუნიციპალიტეტის საკრებულოს თავმჯდომარე მალხაზ გიქოშვილი ასპინძის ქუჩის მკვიდრებს დაჰპირდა, რომ გამარჯვების შემთხვევაში, პირველ რიგში მდინარე ფოცხოვზე საცალფეხო ხიდს აღადგენდა.

გიქოშვილი ამბობს, რომ დაპირების შესრულება ერთი თვის წინ დაიწყო და საცალფეხო ხიდის ნაცვლად მოსახლეობას მიმდინარე წლის ნოემბერში “სამანქანო ხიდს და ხიდამდე მისასვლელ გზას “ჩააბარებს”.

ხიდს ტენდერში გამარჯვებული თბილისური კომპანია შპს “ვანტი” აშენებს. ახალციხის მუნიციპალიტეტის გამგებლის გელა დემეტრაძის თქმით, კომპანიის ძირითად საქმიანობას ხიდების პროექტირება და მშენებლობა წარმოადგენს    

ამ ეტაპზე ხიდის ბურჯები კეთდება. “რვა ბურჯი უნდა გაკეთდეს, ერთი უკვე გაკეთდა. ბურჯების გაკეთება ყველაზე რთული სამუშაოა”, - ამბობს მალხაზ გიქოშვილი.   

ხიდი ბეტონის იქნება, განათებით და ტროტუარებით. სიგრძე 60, ხოლო სიგანე 10 მეტრი ექნება.

გელა დემეტრაძის თქმით, აღნიშნული პროექტის ღირებულება 1 მილიონ 308 ათასი ლარია. რაც შეეხება ნაპირსამაგრი სამუშაოებისა და გზის მშენებლობის ღირებულებას, ორივე ერთად 800 ათას ლარს შეადგენს.

ასევე თბილისური კომპანია, შპს “მითი” ასრულებს ნაპირსამაგრ სამუშოებს. ხიდამდე მისასვლელი გზას კი ადგილობრივი კომპანია შპს “ასტორია” აკეთებს.

ახალციხის მუნიციპალიტეტის გამგებელი გელა დემეტრაძე ამბობს, რომ აღნიშნული სამუშაოებზე ძირითადად ადგილობრივი მოსახლეობაა დასაქმებული: “ასტორია” ადგილობრივი კომპანიაა და დასაქმებულებიც, შესაბამისად, ადგილობრივები არიან. შპს “მითი”-ც ძირითადად ადგილობრივებს ამუშავებს, რაც შეეხება შპს “ვანტს”, ეს კომპანია ისეთ სპეციფიკურ სამუშაოებს ასრულებს, რომ მშენებლობას ყველას ვერ ანდობს. თუმცა, მათ 15-მდე ადგილობრივი მაინც ჰყავთ დასაქმებული”.

საკრებულოს თავმჯდომარის თქმით, ფოცხოვზე გადასასვლელი ხიდის მშენებლობის დასრულების შემდეგ საქალაქო ავტობუსი ასპინძის ქუჩის მიმართულებითაც იმოძრავებს. იგი არ გამორიცხავს შიდა ტრანსპორტის დამატებასაც.