ერთიანი ეროვნული გამოცდები დაიწყო

თამარ თოთაძე, ახალციხე.

 30 ივნისს, საქართველოს მასშტაბით გახსნილ 15 საგამოცდო ცენტრში, ქართული ენისა და ლიტერატურის გამოცდით, ერთიანი ეროვნული გამოცდები დაიწყო.

2011 წლის ერთიანი ეროვნული გამოცდებისთვის რეგისტრაცია 33 898  აბიტურიენტმა გაიარა. საქართველოს იმ ქალაქებში, სადაც უმაღლესი სასწავლებლები არსებობს პირველი გამოცდისთვის რეგისტრაცია დილის რვა საათზე დაიწყო, ცხრა საათზე კი პირველი გამოცდის პირველი სესია. აბიტურიენტების სიმრავლის გამო, თითოეული გამოცდა რამდენიმე სესიად ტარდება და მისი ხანგრძლივობა ოთხი საათია. პირველი სესიისთვის რეგისტრაცია დილის რვა საათზე იწყება, მეორე სესიისთვის   კი 14 საათზე.

ერთიანი ეროვნული გამოცდებისათვის საგამოცდო ცენტრი ახალციხის სახელმწიფო სასწავლო უნივერსიტეტის მეორე კორპუსშია გახსნილი. საგამოცდო ცენტრის მიმდებარე ტერიტორიაზე მობილიზებულია საპატრულო პოლიცია, სასწრაფო სამედიცინო დახმარებისა და სახანძრო სამსახურები. აბიტურიენტებს გამოცდაზე მხოლოდ პირადობის მოწმობის, საგამოცდო ბარათისა და მინერალური წყლის შეტანის უფლება აქვთ.

საგამოცდო ცენტრის ადმინისტრატორის გელა ინასარიძის განცხადებით, ახალციხის საგამოცდო ცენტრში წელს 946 აბიტურიენტია რეგისტრირებული. მათ შორის, 172 ახალგაზრდა ზოგადი უნარების გამოცდას სომხურ, ხოლო 5 რუსულ ენაზე ჩააბარებს. გარდა ამისა, იგივე გამოცდას გრანტის გაუმჯობესების მიზნით, წელს, 96 სტუდენტი აბარებს.

“ერთიანი ეროვნული გამოცდები მშვიდ ვითარებაში მიმდინარეობს, არანაირი დარღვევა არ ყოფილა. ქართული ენისა და ლიტერატურის გამოცდის პირველ დღეს რეგისტრირებული აბიტურიენტებიდან გამოცდაზე სამი არ გამოცხადდა”, - განმარტავს გელა ინასარიძე.

უნივერსიტეტის ეზოში შეკრებილ გულშემატკივრებს გამოცდის მიმდინარეობაზე დაკვირვება ეზოდან, ტელევიზორის საშუალებით შეუძლიათ. ნერვიულობა აბიტურიენტების მშობლებსა და ახლობლებსაც ეტყობათ.

“შვილი აბარებს, კერძო რეპეტიტორთან არ ემზადებოდა. საატესტატო გამოცდები კარგად ჩააბარა და ვფიქრობ, არც ეროვნული გამოცდების ჩაბარება გაუჭირდება”, - ამბობს ლელა მსხვილიძე.

თინათინ ინასარიძე ახალციხის სახელმწიფო სასწავლო უნივერსიტეტში ჰუმანიტარულ ფაკულტეტზე ჩაბარებას აპირებს. ქართული ენისა და ლიტერატურის გამოცდაზე სრული ოთხი საათი გამოიყენა. ამბობს, რომ დრო საკმარისი იყო და გამოცდამ წარმატებით ჩაიარა: “ერთი წელი ვემზადებოდი რეპეტიტორებთან და იმედი მაქვს, რომ წარმატებით ჩავაბარებ. რთული არ იყო, რაც ნასწავლი გვქონდა, ზუსტად ის მასალა შემხვდა. უბრალოდ, ნერვიულობის ფაქტორია და შეიძლება ცოტა დაიბნე. პირველი გამოცდა იყო, გამოცდილება მივიღე და მეორე გამოცდაზე უკეთ შევხვდები ყველაფერს”.

ამავე ფაკულტეტზე ჩაბარება უნდა სოფელ სვირში მცხოვრებ სოფო სამსონიძესაც: “ჰუმანიტარულ ფაკულტეტზე, კერძოდ ფილოლოგიური მინდა. არ იყო ძალიან ძნელი, საშუალო სირთულის იყო. მშვენივრად გავართვი თავი და ვნახოთ როგორი შედეგი მექნება”.

ერთიანი ეროვნული გამოცდების განრიგი ასეთია: 30 ივნისი – 1 ივლისი – ქართული ენა და ლიტერატურა; 4 და 5 ივლისი – ზოგადი უნარები; 6 ივლისი – უცხოური ენა (ინგლისური ენა, გერმანული ენა, ფრანგული ენა); 7 და 8 ივლისი – უცხოური ენა (ინგლისური ენა); 11 ივლისი – უცხოური ენა (რუსული ენა); 12 ივლისი – ისტორია; 13 ივლისი – მათემატიკა;  14 ივლისი – ლიტერატურა; 15 ივლისი – სტუდენტთა საგრანტო კონკურსი; 18 ივლისი – ბიოლოგია; 19 ივლისი – გეოგრაფია; 20 ივლისი – ქიმია; 21 ივლისი – ფიზიკა.

საქართველოს განათლებისა და მეცნიერების სამინისტროს გამოცდების ეროვნული ცენტრი გარდა ერთიანი ეროვნული გამოცდებისა, საერთო სამაგისტრო და მასწავლებელთა სასერთიფიკაციო გამოცდების ჩატარებასაც იწყებს. 6-21 ივლისს პედაგოგთა სასერთიფიკაციო გამოცდები ჩატარდება, ხოლო 14-15 ივლისს საერთო სამაგისტრო გამოცდები.