ბანაკი ახალქალაქში

 შუშან შირინიანი, ახალქალაქი

  

11 ივლისს ახალქალაქში საზაფხულო ბანაკი “ტავშანკა” გაიხსნა. 125 ბავშვი საზაფხულო არდადეგებს ბუნების წიაღში გაატარებს.

ბანაკში გასამგზავრებლად ახალგაზრდები ახალქალაქის კულტურის სახლის ახლოს 11 ივლისს, დილიდანვე შეიკრიბნენ. აქ იყვნენ მშობლებიც, რომლებსაც მათი შვილების აღმზრდელების გაცნობა სურდათ. აქვე იყვნენ აღმზრდელები ანუ ლიდერები, როგორც მათ ეძახიან. მას შემდეგ რაც სიებში აღნიშნული ყველა ბავშვი შეგროვდა, ავტობუსები ამირანის გორისკენ (ტავშან-ტაპა) დაიძრნენ.   

ბანაკი მთაზე შეფენილ ფიჭვის ტყესა და მდინარე ფარავანს შორის მდებარე დაბლობზე გაიშალა.

საზაფხულო ბანაკი ახალქალაქში მეოთხე წელია არსებობს. აქ 7-დან 14 წლამდე ასაკის ბავშვები ისვენებენ. წელს ბავშვები ბანაკში ორ ნაკადად, 15-15 დღით ჩავლენ. ბანაკი 12 აგვისტომდე იმუშავებს. ყოველ ნაკადში 125 ბავშვია, ისინი ხუთ ჯგუფად დაიყოფიან, თითოეულში 25 ბავშვი იქნება.

12 წლის შოთა აბრამიანი ბანაკში ყოველ წელს ისვენებს. “ერთ წელს ორივე ნაკადში ჩამოვედი, აქ ყველაფერი ძალიან მომწონს. მეგობრებთან ერთად ვთამაშობ, ვვარჯიშობთ. ზოგჯერ ვცელქობთ კიდეც. თუ ჩემი მეგობრები ჩხუბობენ, მეც აუცილებლად ვერევი”.

ბავშვები ყოველ დილას, 11 საათზე კულტურის სახლის ეზოდან ბანაკში ავტობუსით მიდიან და დღის 4 საათისთვის უკან ბრუნდებიან. საზაფხულო ბანაკს ახალქალაქის მუნიციპალიტეტი აფინანსებს. წელს ამ მიზნით 20 ათასი ლარი გამოიყო.

ახალქალაქის მუნიციპალიტეტის გამგეობის კულტურის, სპორტის, განათლების, კულტურისა და ახალგაზრდობის საქმეთა სამსახურის უფროსი ვალერი სტელმაშოვი ამბობს, რომ ბანაკში, ყველაფერთან ერთად, ბავშვების ინტელექტუალურ განვითარებაზეც ზრუნავენ:

“ბავშვები ბანაკში ინგლისურს, ქართულს და სხვადასხვა სპორტულ თამაშებს ისწავლიან. ჩვენ დიდ ყურადღებას ვაქცევთ, რომ დასვენების გარდა, ინტელექტუალური ცოდნაც მიიღონ”.

ბავშვები ბანაკში დღეში ერთხელ, ბუტერბროდებითა და მშრალი საკვებით სადილობენ.

ბანაკში არის ონკანები. წინა წელს აწყობილი საპირფარეშოები გატეხეს და გაძარცვეს, თუმცა, ორგანიზატორთა თქმით, წელს ახლები მოეწყობა.

ბანაკის მედდა კარინე რსტაკიანი მეოთხე წელია საკვების ხარისხს ადევნებს თვალს და ბავშვებს საჭიროებისამებრ სამედიცინო დახმარებას უწევს. მისი თქმით, ამ წლების განმავლობაში მოწამვლის ერთი შემთხვევაც არ ყოფილა: “ვაკონტროლებთ, რომ საკვები ყოველთვის ახალი იყოს. პირველადი სამედიცინო დახმარების ყველა მედიკამენტი გვაქვს. მდინარეში ბანაობას ვუკრძალავთ, რადგან შეიძლება გაცივდნენ, ამასთან წყლიდან დაავადებაც შეიძლება შეეყაროთ, იქ ბევრია გატეხილი ბოთლები და შეიძლება ნამსხვრევებზე ფეხი გაიჭრან. თვალს ვადევნებთ, რომ ბანაკის ტერიტორიას ძალიან არ მოშორდნენ, რადგან ტყის სიღრმეში შეიძლება გველები შეხვდეთ”.

ბანაკის ტერიტორიაზე ჩასვლისთანავე ბავშვებმა ხალიჩები გაშალეს და თამაში დაიწყეს. შემდეგ ბოთლებისა და სხვადასხვა ნაგვისგან ბანაკის მთელი ტერიტორია გაწმინდეს.

აღმზდელები ამბობენ, რომ ცდილობენ ბავშვებს საინტერესო შეჯიბრები მოუწყონ. ერანუი მაკარიანი ამბობს, რომ ბანაკში ბავშვები, ყველაფერთან ერთად, საზოგადოებაში ქცევას სწავლობენ.

“ბავშვებს ერთმანეთთან ურთიერთობას და ბუნების მოფრთხილებას ვასწავლით. ისინი ბანაკში სიამოვნებით დადიან. პირველი ორი დღე შედარებით მძიმეა, როდესაც ერთმანეთს ეჩვევიან, შემდეგ კი ერთმანეთთან საერთო ენას პოულობენ. გაუგონრებისთვის სასჯელიც გვაქვს, მათ გარკვეული დროით თამაშებიდან ან რაიმე ღონისძიებიდან ვრიცხავთ”, - ამბობს ერანუი მაკარიანი.

აღმზრდელ ფირუზა ტერ მაკარიანს უნდა, რომ წელს ბავშვებთან ერთად ბანაკის ჰიმნი დაწერონ: “აქ ბავშვები სიმღერასა და ცეკვას სწავლობენ. წელს ბევრი ბავშვია, ვინც შარშანაც იყო და არიან ახალი ბავშვებიც. მინდა, მათთან ერთად ბანაკის ჰიმნი დავწერო”.

14 წლის ედუარდ მელიქიძე ბანაკში პირველადაა. იგი მეგობრებთან ერთად ჩამოვიდა და ჯერჯერობით, აქ ყველაფერი მოწონს.

“თუ რაიმე არ მომეწონება, აღარ მოვალ, ჯერჯერობით კი ყველაფერი კარგია”, - ამბობს ედუარდ მელიქიძე.

თითოეულ ჯგუფს სხვადასხვა ფერის კეპები დაურიგეს და აღმზრდელების თქმით, კეპის ფერით ისინი იოლად ასხვავებენ რომელი ბავშვი რომელ ჯგუფშია.