პრეზიდენტი “საქართველოს მთავარ საკურორტო” ქალაქში

 ნატალია კოპაძე, ბორჯომი

 23 ივლისს საქართველოს პრეზიდენტმა მიხეილ სააკაშვილმა ბორჯომში მშენებარე ობიექტები დაათვალიერა და ადგილობრივ მოსახლეობას შეხვდა.

 პრეზიდენტმა ბორჯომის ცენტრალური პარკის წინ მდებარე სრულიად განახლებული მოედანი და და ბორჯომში მშენებარე სასტუმროები მოინახულა.

ბორჯომის ცენტრალური პარკის შესასვლელის სარეკონსტრუქციო სამუშაოებისთვის საქართველოს ცენტრალური ბიუჯეტიდან 1,5 მილიონი ლარი გამოიყო. პროექტის თანახმად, შეიცვალა პარკის შესასვლელი კარი, სრული რეკონსტრუქცია ჩაუტარდა პარკის წინ მდებარე მოედანს, დაიგო ქვაფენილი და დამონტაჟდა ლამპიონები. აქვე მოეწყო ღია კაფეც.

“ბორჯომი არის საქართველოს მთავარი კურორტი, უბრალოდ, ამდენი წელი ეკონომიკა არ გვაძლევდა საშუალებას, ახლა წყალსადენი და კანალიზაცია იცვლება, ყველაფერი კეთდება. სიღნაღში და მესტიაში რაც კეთდება, იმაზე უკეთესად გავაკეთებთ, იმიტომ რომ მეტი ვისწავლეთ. წელს დავიწყეთ, მივყვებით და მომავალ წელს იქნება ბორჯომის დიდი გახსნა”, - განაცხადა მიხეილ საკააშვილმა.

პრეზიდენტი ბორჯომში მოსახლეობასაც შეხვდა. გარდა ამისა, დაათვალიერა 120 წლის წინ, ირანელი დიპლომატისთვის აშენებული სანატორიუმის ,,ფირუზას” სარესტავრაციო სამუშაოები და 9 აპრილის ქუჩაზე მდებარე სასტუმროს მშენებლობა.

პრეზიდენტმა აღნიშნა, რომ მალე მთელი ბორჯომი განახლდება.

“როგორც ჩანს ყახაზები ლიკანში ვერ აგრძელებენ სამუშაოებს, აუცილებლად უნდა დაველაპარაკოთ და რაღაცნაირად ვიპოვოთ გზა, რომ განახლდეს მშენებლობა. ბორჯომი იცის მთელმა მსოფლიომ, ყოველ შემთხვევაში, ჩვენმა ნაწილმა: რუსეთი, უკრაინა, ყაზახეთი, უზბეკეთი, აზერბაიჯანი, სომხეთი, ბელარუსი, პოლონეთი. ყველა ეს ხალხი დღე და ღამე აქ უნდა იჯდეს, ზაფხულშიც და ზამთარშიც”, - განაცხადა პრეზიდენტმა და დასძინა, რომ ბორჯომში გოგორდის აბანოებიც უნდა აღდგეს.