სად დავისვენოთ ქალაქიდან გაუსვლელად

 თამარ თოთაძე, ახალციხე

ივლისის ბოლოდან დასვენებისთვის აქტიური პერიოდი იწყება, თუმცა შვებულება და კურორტებზე დასასვენებლაც საჭირო დრო და ფული ყველას როდი აქვს. რა არჩევანია ახალციხეში?

 ზაფხულის ცხელი დღეების გატარებას ყველა სხვადასხვაგვარად ცდილობს. ნაწილი დასასვენებლად ზღვაზე მიდის, ზოგს მთაში დასვენება ურჩევნია. არიან ისეთებიც, რომლებიც სხვადასხვა მიზეზების გამო ქალაქიდან გასვლას ვერ ახერხებენ.

“შვიდი წელია დასასვენებლად ქალაქიდან არ გავსულვარ. შვებულების დროსაც კი სამსახურში მიწევს ყოფნა. ამიტომ, როცა დრო მაქვს, მეგობრებთან ან ოჯახთან ერთად, ურავლის ხეობაში გავდივარ. ძირითადი დასასავენებელი ადგილი ახალციხეში მაინც ესაა”, - ამბობს სამოქალაქო რეესტრის სააგენტოს ახალციხის სამსახურის უფროსი ალექსანდრე გოგიძე.  

ურავლის ხეობა ახალციხელებისთვის ერთ-ერთი საუკეთესო დასასვენებელი ადგილია. ზოგი მინდორში, მდინარის ნაპირას შლის სუფრას, ხოლო, ისინი ვისაც საშუალება აქვს, ურავლის ხეობაში მომრავლებულ ფაცხებსა და რესტორნებს სტუმრობენ.

რესტორან “ედემში”, რომელიც გასულ წელს გაიხსნა, სეზონი მაისის შუა რიცხვებიდან იწყება. რესტორნის თანამშრომლები ამბობენ, რომ ფასები ხელმისაწვდომია და კლიენტი კმაყოფილი რჩება.

“ერთხელ მოსული სტუმარი მეორედაც მოდის. მუდმივი კლიენტებიც გვყავს და ყველანაირად ვცდილობთ, რომ კმაყოფილი გავისტუმროთ. რესტორნის მუშაობის დრო განსაზღვრული არ არის, შეიძლება ღამის ორ საათამდეც ვიმუშაოთ, - ამბობს რესტორან “ედემის” ადმინისტრატორი ივანე აფრიამაშვილი და ამატებს, რომ აქ ტრადიციულ ქართულ კერძებთან ერთად ევროპული სამზარეულოცაა. ასევე რესტორანს ორი საფირმო კერძი “ედემი” და “ათასი კუნძული” აქვს: აქ მოსვლა ნებისმიერი ასაკის მომხმარებელს შეუძლია. ჰამაკი და გასართობი სასრიალოებიც გვაქვს”.

“ედემისგან” განსხვავებით მომხმარებელს საუკეთესო პირობებს ვერ სთავაზობს ურავლის ხეობაში მდებარე ფაცხები. ფაცხების მზარეული მალხაზ მიქელაძე ამბობს, რომ კლიენტი ბევრი არ ჰყავთ. მათთან დამსვენებლები ძირითადად “საკუთარი პურ-მარილით” მიდიან: “ფასი ყველასთვის ხელმისაწვდომი რომ იყოს, ცარიელი ფაცხები არ გვექნებოდა. პური აღარ ეყიდებათ მაღაზიებში და აქ ვინ მოვა საქეიფოდ. ამ ეტაპზე ორი ძირითადი თანამშრომელი ვართ; მიმტანი და მზარეული. ჩვენი ხელფასი კლიენტების რაოდენობაზეა დამოკიდებული”.

ისინი ვინც, ვერც ურავლის ხეობაში ახერხებენ გასვლას, ზაფხულის ცხელ დღეებში გასაგრილებლად სასტუმრო “რიო”-სთან არსებულ საცურაო აუზს სტუმრობენ. სასტუმროს ადმინისტრატორი გიორგი გოგოლაძე ამბობს, რომ აუზზე კლიენტები ყოველთვის ჰყავთ. ნორმალური პირობებია და ფასიც ხელმისაწვდომია: “კლიენტი მომსახურებით კმაყოფილია. დღეში, საშუალოდ, 20-30 ადამიანი მოდის. შაბათ-კვირას უფრო მეტი ხალხია”.

აუზის ერთთვიანი აბონემენტის ფასი 30 ლარია, ამ თანხაში აუზზე ექვსი ვიზიტი შედის. ერთჯერადად გადახდისას კი ერთი ვიზიტის ფასი ხუთი ლარია.

აუზს ამ ეტაპზე ცურვის კონსტრუქტორი არ ჰყავს. აუზის ადმინისტრაცია ვარაუდობს, რომ უახლოეს პერიოდში, როცა ზაფხულის სეზონი აქტიურ ფაზაში შევა, ცურვის მასწავლებელსაც აიყვანენ.