სახელმწიფო გრანტის გაცემის წესი შეიცვალა

ერთიანი ეროვნული გამოცდებისთვის აბიტურიენტთა რეგისტრაცია დაიწყო. იმოქმედებს თუ არა სახელმწიფო გრანტის გაცემის შეცვლილი წესი აბიტურიენტთა არჩევანზე.

მიმდინარე წლიდან სამართლის, ჯანდაცვის, ბიზნეს ადმინისტრირების, ჟურნალისტიკის, საერთაშორისო ურთიერთობებისა და საჯარო მმართველობის ფაკულტეტების სტუდენტები 70, 50 და 30-პროცენტიანი სასწავლო გრანტით აღარ დაფინანსდებიან. ისინი სახელმწიფოსგან დახმარებას იმ შემთხვევაში მიიღებენ, თუ ქულათა მაქსიმალურ რაოდენობას დააგროვებენ, ანუ მოიპოვებენ 100-პროცენტიან გრანტს. ყველა სხვა ფაკულტეტზე თანადაფინანსების წესი შენარჩუნებულია. სტუდენტებს კვლავ აქვთ შანსი მიიღონ 30, 50, 70, ან 100-პროცენტიანი დაფინანსება.


დაფინანსების წესის ცვლილება საქართველოს პრეზიდენტის იმ ცნობილ საჯარო გამოსვლას უკავშირდება, როცა მან პრიორიტეტებზე ისაუბრა და საბუნებისმეტყველო მეცნიერებები მკვდარ მეცნიერებებად მოიხსენია.

სახელმწიფოს გრანტის გაცემის წესის შეცვლამ აბიტურიენტების არჩევანზეც იმოქმედა. მათი უმეტესობა ცდილობს ისეთ სპეციალობებზე ჩააბაროს, რომ სახელმწიფოსგან გარკვეული დაფინასება მაინც მოიპოვოს.

პირველი საჯარო სკოლი მეთორმეტე კლასის მოსწავლე ცოტნე ლეკიშვილი სწავლის გაგრძელებას სამართალმცოდნეობის ფაკულტეტზე აპირებდა. თუმცა, მას შემდეგ რაც მის მიერ არჩეულ ფაკულტეტზე თანადაფინანსების წესი შეიცვალა, ცოტნემ ამ სპეციალობაზე ჩაბარება გადაიფიქრა.

,,ახლა კონკრეტული ფაკულტეტი, რაზეც ჩავაბარებ, გადაწყვეტილი არ მაქვს. ალბათ იმ სპეციალობას ავირჩევ, სადაც გრანტის მოპოვების ოთხივე საფეხური იქნება'', - ამბობს ცოტნე ლეკიშვილი და ამატებს, რომ წელს სამართალმცოდნეობის ფაკულტეტზე მიღება, მხოლოდ რამდენიმე უნივერსიტეტშია გამოცხადებული. შესაბამისად, ამ ფაკულტეტზე კონკურსიც მაღალი იქნება, ხოლო 100-პროცენტიანი გრანტის მოპოვება ნაკლებად შესაძლებელი.

ამავე სკოლის, მეთორმეტე კლასის მოსწავლე გიორგი გელაძე კი ამბობს, რომ ცვლილების შესახებ სასწავლო წლის დასაწყისშივე რომ სცოდნოდათ, ზუსტ და საბუნებისმეტყველო სპეციალობებზე ჩაბარებას უფრო მეტი აბიტურიენტი გადაწყვეტდა.

,,სექტემბერში უკვე ვიცოდით, ვინ რომელ ფაკულტეტზე და რა საგანს ჩავაბარებდით. ამიტომ, ძირითად, ოთხ საგანში დავიწყეთ მომზადება'', - ამბობს გიორგი გელაძე.

საქართველოს მთავრობა სახელმწიფო გრანტის სახით ყოველწლიურად 11 მილიონ ლარს გასცემს. ამ თანხის დაახლოებით 85 პროცენტი საერთაშორისო სამართლის სპეციალისტების, ექიმებისა და სამართალმცოდნეების მომზადებაზე იხარჯება.

,,ეს სპეციალობები საკმაოდ პოპულარული და დასაქმებადია. საბუნებისმეტყველო მეცნიერებების მიმართულებით სპეციალისტების დეფიციტი არა მხოლოდ საქართველოში, არამედ მთელს მსოფლიოშია'', - ამბობს ახალციხის სახელმწიფო სასწავლო უნივერსიტეტის სასწავლო პროცესების მართვის უფროსი ნიკოლოზ ახალკაცი.

მასწავლებლები ფიქრობენ, რომ ცვლილება დროთა განმავლობაში გაამართლებს. ამ ეტაპზე კი მოსწავლეების მხრიდან საბუნებისმეტყველო საგნებით დაინტერესება ნაკლებია.

,,მეცხრე –მეათე კლასში საკმაოდ კარგად სწავლობენ. თუმცა, ინტერესი მშემდეგ უკვე ქრება და ბავშვები მხოლოდ იმ საგნებზე არიან გადართულები, რომლებიც მისაღებ გამოცდებზე უნდა ჩააბარონ'', - ამბობს მეექვსე საჯარო სკოლის, ქიმია-ბიოლოგიის პედაგოგი მაია მექვაბიშვილი.

პირველი საჯარო სკოლის ფიზიკის პედაგოგი მაკა ჯანაშვილი კი მიიჩნევს, რომ თუ საბუნებისმეტყველო სპეციალობები უფრო პრიორიტეტული გახდება, ამ მიმართულებებზე მეტი აბიტურიენტი ჩააბარებს.

,,ძირითადად იმ სპეციალობებს ირჩევენ, რაზეც საქმდებიან. ერთი-ორი წლის შემდეგ ბავშვები უკვე მიხვდებიან, რომ ეს სპეციალობები დასაქმების კუთხით პრიორიტეტულია'', - ამბობს მაკა ჯანაშვილი.

ახალციხის სახელმწიფო სასწავლო უნივერსიტეტში საბაკალავრო პროგრამებზე წელს 740 ადგილია გამოცხადებული. აქედან, ზუსტ და საბუნებისმეტყველო სპეციალობებზე ჩაბარება 140 აბიტურიენტს შეეძლება. გარდა ამისა, ქართული ენის პროგრამაზე სომეხ და აზერბაიჯანელ ენოვანი მსმენელებისთვის 74 ადგილია.

,,საბუნებისმეტყველო მეცნიერებებისთვის 140 ადგილია გათვლილი, ხოლო დანარჩენი განათლების, ჰუმანიტარულ და სოციალურ მეცნიერებათა და ბიზნეს ადმინისტრირების ფაკულტეტზე'', - გვიხსნის ნიკოლოზ ახალკაცი.

მისივე თქმით, გასულ წლებთან შედარებით ამ მიმართულებით მისაღები ადგილების რაოდენობა გაიზარდა: ,,წელს თითქმის ორჯერ მომატებულია განაცხადების რაოდენობა'', - აღნიშნავს ნიკოლოზ ახალკაცი.

ერთიანი ეროვნული გამოცდებისთვის აბიტურიენტთა რეგისტრაცია 14 თებერვალს დაიწყო და 25 მარტამდე გაგრძელდება. რამდენად წაახალისებს პრეზიდენტის ინიციატივა აბიტურიენტებს, რა უფრო მნიშვნელოვანია მომავალი პროფესიის არჩევისას, თანადაფინანსება თუ სურვილი და გაიზრდება თუ არა დაინტერესება საბუნებისმეტყველო მეცნიერებებით, ერთიანი ეროვნული გამოცდების დასრულების შემდეგ გაირკვევა.

თამარ თოთაძე, ახალციხე