განაჩენი ექვსი თვის შემდეგ

ახალციხის რაიონულმა სასამართლომ მაჰმადიანი მესხების საერთაშორისო არასამთავრობო ორგანიზაცია ,,ვათანის'' ლიდერს სულეიმან ბარბაქაძეს განაჩენი გამოუტანა.  

ცხრა სასამართლო პროცესის გამართვის შემდეგ, ახალციხის რაიონულმა სასამართლომ ბარბაქაძეს განაჩენი 18 იანვარს გამოუტანა. ექვსთვიანი სამართალწარმოება მძიმე განაჩენით დასრულდა _ 11 წელი თავისუფლების აღკვეთა და დამატებითი სასჯელის სახით 30 ათასი ლარი ჯარიმა.


სულეიმან ბარბაქაძე სისხლის სამართლის კოდექსის 180-ე მუხლის მესამე ნაწილით, თაღლითობის ბრალდებით 2010 წლის 26 ივლისს დააკავეს. თუმცა, გამოძიების მიმდინარეობისას საქმე გადაკვალიფიცირდა და მას ბრალი სისხლის სამართლის 185-ე და 210-ე მუხლებით გათვალისწინებული დანაშაულის ჩადენისათვის ედება.
185-ე მუხლის მესამე ნაწილის ,,ბ''  ქვეპუნქტი ,,მოტყუებით ქონებრივ დაზიანებას’’ გულისხმობს. 210-ე მუხლის მეორე ნაწილის ,,ა'' ქვე პუნქტი კი: ,,ყალბი საკრედიტო ან საანგარიშგებო ბარათის სხვა საგადასახდო დოკუმენტის, ან ქონებრივი უფლებამოსილების დამადასტურებელი ისეთი დოკუმენტის დამზადებას, გასაღებას ან გამოყენებას, რომელიც არ არის ფასიანი ქაღალდი''.
185-ე მუხლი თავისუფლების აღკვეთას ოთხიდან ექვსი წლის ვადით ითვალისწინებს, 210-ე კი ოთხიდან - შვიდი.
განაჩენის (საქმე #1/287-10წ) თანახმად 210-ე მუხლით გათვალისწინებული დანაშაული ბარბაქაძემ სამჯერ – 2007 წლის 20 ოქტომბერს, 2008 წლის 8 თებერვალს და ამავე წლის 22 თებერვალს ჩაიდინა.
მსჯავრდებულმა ერთ-ერთი დაზარალებულისგან, გიორგი თუმასიანისაგან ახალციხეში, ბორჯომის ქუჩა #32-ში მდებარე ორსართულიანი სახლი იყიდა. თუმასიანი ბინას მის გარშემო არსებული 700 კვადრატული მეტრი მიწის ნაკვეთით 35 ათას ამერიკულ დოლარად ყიდდა.
,,ჩვენი მოლაპარაკება ბინის ყიდვისას დასრულდა იმით, რომ სახლი ბარბაქაძისათვის უნდა მიმეყიდა 25 ათას დოლარად, ხოლო 10 ათასი დოლარის სანაცვლოდ შევთანხმდით, რომ შემდგომ ბარბაქაძე დამეხმარებოდა რუსეთში სახლის ყიდვასა და ჩაწერაში. ბარბაქაძემ თანმხლებ პირებთან თანდასწრებით რამდენჯერმე განმიცხადა: აიღე საზღვარგარეთის პასპორტები, ჩამოდი არმავირში და მე ჩემი ავტორიტეტით მოგიგვარებ ყველაფერსო. მე მას მივეცი ჩემი ახლობლის მისამართები, მან კი მომცა ტელეფონის ნომერი. ამის შემდეგ ბარბაქაძემ მოგვატყუა და არ შეგვისრულა დანაპირები. რის შედეგადაც რუსეთის ფედერაციაში ყოფნის დროს გაგვასამართლეს და მოახდინეს ჩვენი დეპორტაცია'', - ვკითხულობთ თუმასიანის სარჩელში.

გიორგი თუმასიანის ადვოკატის ბიჭიკო მოდებაძის თქმით, იგი ბარბაქაძის პატიმრობას არ ითხოვდა: ,,ჩვენ მხოლოდ ზარალის ანაზღაურება გვინდოდა. თუმცა, სასამართლო ამაზე არ წამოვიდა''.
გარდა, სახელმწიფოს სასარგებლოდ გადასახდელი 30 ათასი ლარისა, მსჯავრდებულს სასამართლომ გიორგი თუმასიანის სასარგებლოდ მიყენებული ზარალისა და მორალური ზიანის ანაზღაურებაც დააკსირა. ზარალის ოდენობა 10 ათას დოლარს, ზიანისა კი სამი ათას ლარს შეადგენდა.
არასამთავრობო ორგანიზაცია ,,ტოლერანტის'' თავმჯდომარე ცირა მესხიშვილი მიიჩნევს, რომ განაჩენი მკაცრია: ,,ასაკოვანი კაცია. 11 წელს პლიუს ამხელა ჯარიმა?! არაა ისეთი ადამინი, რომ საზოგადოებისგან იზოლირებული იყოს. თუნდაც ოთხწლიანი სასჯელი საკმარისი იქნებოდა იმისათვის, რომ სამომავლოდ სხვა ლიდერებსაც იგივე არ გაკეთებინათ''.  

მესხიშვილის განცხადებით, იგი საქართველოში ,,ვათანის'' ფუნქციონირებას ყოველთვის აპროტესტებდა: ,, იმიტომ არა, რომ ქვეყანაში რაიმე ორგანიზაციის არსებობის წინააღმდეგი ვარ. უბრალოდ, მათი პოზიცია, სამშობლოში მაჰამდიანი მესხების გადმოსახლების შესახებ, სახელმწიფო ინტერესებს ყოველთვის ეწინააღმდეგებოდა. ამ ლიდერებს, არ ვგულისხმობ მხოლოდ ბარბაქაძეს, ქვეყანაში ქაოსი შემოჰქონდათ''. 

ბარბაქაძისათვის განაჩენის გამოტანიდან ორი კვირის შემდეგ, 7 თებერვალს, ევრო საბჭოს დელეგაციამ დახურული შეხვედრა გამართა.
,,შეხვედრა სულეიმან ბარბაქაძის დაკავების დეტალებსა და რეალური მიზეზების განხილვას ეხებოდა. ამ საკითხებთან დაკავშირებით ჩვენი სამართლებრივი ექსპერტიზა სჭირდებოდათ'', - განუცხადა ,,სამხრეთის კარიბჭეს'' ახალგაზრდა იურისტთა ასოციაციის თავმჯდომარემ თამარ ჩუგოშვილმა.
მსჯავრდებულის ადვოკატი ლერი ქათამაძე ახალციხის რაიონული სასამართლოს მიერ გამოტანილ განაჩენს უკანონოს, დაუსაბუთებელსა და არასამართლიანს უწოდებს: ,,განაჩენის სააპელაციო წესით გასაჩივრებას ვაპირებ, ამჟამად სააპელაციო საჩივარზე ვმუშაობ''.
როგორ განაჩენს გამოიტანს სააპელაციო სასამართლო და რა ღონისძიებების გატარებას გადაწყვეტს ევრო საბჭოს დელეგაცია, ამას მომავალი გივჩვენებს.

თამუნა უჩიძე, ახალციხე