ჰიბრიდული სიმინდის ჯიშზე დაბალი მოთხოვნაა

არასამთავრობო ორგანიზაცია ,,საქართველოს მწვანეთა მოძრაობა'' სოფლის მეურნეობის სამინისტროს ინიციატივით საქართველოში ჰიბრიდული სიმინდის სათესლე მასალის შემოტანასა და რეგიონებში გავრცელებას აპროტესტებს. ორგანიზაციის ინფორმაციით, სათესლე მასალა დამუშავებულია ჯანმრთელობისთვის საშიში ნივთიერებებით.

საქართველოს სოფლის მეურნეობის სამინსტროს ინიციატივით, ს.ს. ,,სოფლის მეურნეობის კორპორაციამ'' გასულ წელს სიმინდის წარმოების ხელშემწყობი პროგრამა დაიწყო.
სიმინდის წარმოების ხელშეწყობის პროგრამაში დარეგისტრირება შესაძლებელია საკონსულტაციო ცხელი ხაზის, ადგილობრივი მუნიციპალიტეტების ან სარეგისტრაციო ფორმის შევსების მეშვეობით.

სიმინდის თესლის შეძენის მსურველთა რეგისტრაცია გასული წლის ნოემბერში დაიწყო და როგორც ახალციხის მუნიციპალიტეტში ამბობენ უკვე დასრულდა. ,,შევხვდით სოფლის რწმუნებულებს და ახალი პროგრამა გავაცანით, გარდა ამისა ყველა სოფელში ფლაერები გავაკარით. ვისაც პროგრამაში მონაწილეობის სურვილი ჰქონდა მათ სპეციალური ფორმები შეავსეს, რომელიც სამინისტროში უკვე მესამედ ჩავიტანეთ'',-ამბობს ახალციხის მუნიციპალიტეტის გამგებლის თანაშემწე ალექსანდრე კოსტანიშვილი.
სიმინდის თესლის ყიდვის შესახებ განცხადება ამ დრომდე მხოლოდ 80 ოჯახმა დაწერა. როგორც ალექსანდრე კოსტანიშვილი ამბობს განცხადებები დაგვიანებითაც მოდის, თუმცა რამდენად დააკმაყოფილებენ მათ მოთხოვნას ჯერ-ჯერობით უცნობია: ,,რეგისტრაცია დამთავრდა, თუმცა რამდენიმე განცხადება კიდევ მოვიდა. ფორმებს სამინსტროში ჩავიტანთ და თვითონ გადაწყვეტენ დააკმაყოფილონ თუ არა მათი მოთხოვნა''. 
სოფლის მეურნეობის სამინსტრო ჰიბრიდული სიმინდის თესლს, ახალციხის მუნიციპალიტეტს გადასცემს: ,,სამინსიტრო ჩვენ გადმოგვცემს საჭირო რაოდენობის სიმინდის თესლს. ფერმერები აქ მოვლენ და წაიღებენ მათთვის განკუთვნილ რაოდენობას. ერთი კილოგრამი სიმინდის ღირებულება 10 ლარია, ფერმერებს საშუალება ეძლევათ 6 თვის განმავლობაში დაფარონ თანხა'',-ამბობს ალექსანდრე კოსტანიშვილი.
სოფლის მეურნეობის სამინისტროს ინფორმაციით, ამერიკული ჰიბრიდული სიმინდის თესლი გამოირჩევა მაღალი მოსავლიანობით, გვალვაგამძლეობით და სრულყოფილი ხარისხიანი მარცვლით.
საქართველოს ,,მწვანეთა მოძრაობა'' კი ფიქრობს რომ სოფლის მეურნეობის სამინისტრო ფერმერებს უხარისხო, გენმოდიფიცირებულ სათესლე მასალა სთავაზობს, რომელიც დამუშავებულია ჯანმრთელობისთვის საშიში ნივთიერებებით. ,,ჩვენი ორგანიზაცია წინააღმდეგია საქართველოში კომპანია `პიონერის~ მიერ შემოტანილი სიმინდის თესლის მაისიური გავრცელების. ეს კომპანია გენმოდიფიცირებული თესლის წარმოებითაა ცნობილი, თუმცა ჯერ კიდევ არ არის გარკვეული სიმინდის თესლი გენმოდიფიცირებულია თუ რა'',-ამბობს არასამთავრობო ორგანიზაციის ,,მწვანეთ მოძრაობის''ბიო-მრავალფეროვნების პროექტების კოორდინატორი მარინა ჟორდანია.
მარინა ჟორდანიას თქმით, ასევე უცნობია გაიარა თუ არა აღნიშნულმა თესლმა გამოცდა, რამდენად ეფექტური და მისაღებია ზემოთაღნიშნული თესლი ჩვენი რეგიონისთვის: ,,სასოფლო-სამეურნეო და გარემოსდაცვითი თვალსაზრისით, ცნობილია, რომ ჰიბრიდული ჯიშები დაპირებულ ,,უხვ'' მოსავალს მხოლოდ პირველ წელს იძლევა, ისიც თუ უხვად გავაჯერებთ მომწოდებელი კომპანიის მიერ წარმეობული შხამ-ქიმიკატებით''.
ბიო-მრავალფეროვნების პროექტების კოორდინატორის განცხადებით საქართველოში ასეთი თესლის შემოტანა ბევრ საფრთხეს შეიცავს; ,,გადაშენდება ადგილობრივი ჯიშები, დაბინძურდება გარემო და გლეხი დამოკიდებული გახდება უცხოურ კომპანიაზე, რადაგნ თვითონ ვერ მიიღებს სათესლე მასალას, ამიტომ იძულებული იქნება ყოველ წელს შეიძინოს სათესლე მასალა’’.  

სოფლის მეურნეობის სამინისტრო უარყოფს გავრცელებულ ინფორმაციას იმის შესახებ, რომ ჰიბრიდული სიმინდის სათესლე მასალა ჯანმრთელობისთვის საშიში ნივთიერებებს შეიცავს და აქაც რუსულ კვალს ხედავს. სამინსიტროს ინფორმაციით, ამერიკული სიმინდის თესლის შემოტანას ის ადამიანები ეწინააღმდეგებიან, ვინც პირადი ინტერესების გამო რუსული წარმოების გაურკვეველ ჰიბრიდებს იცავს.

რას ფიქრობენ აღნიშნულ საკითხზე ახალციხეში და იზიარებენ თუ არა ,,მწვანეთა მოძრაობის'' მოსაზრებას ამის გასარკვევად ახალციხის სასოფლო-საკონსულტაციო სამსახურის სპეციალისტს პავლე გიქოშვილს მივმართეთ.

მისი თქმით სიმინდის ეს ჯიში სამცხე-ჯავახეთის კლიმატურ პირობებს მორგებულია.
,,ჩვენ უკვე მეოთხე წელიწადია ჰიბრიდული სიმინდის ჯიშს ფერმერებს ვთავაზობთ. ფერმერებს კარგი მოსავალიც აქვთ. არსებობს სხვადასხვა ვეგეტაციის გრძელი და მოკლე თესლი. 90 დღიანი ვეგეტაციის სიმინდი ჩვენთან ჩვეულებრივად მწიფდება'',- განმარტავს პავლე გიქოშვილი.
რაც შეეხება ქართული ჯიშის სიმინდის გადაშენებას, პავლე გიქოშვილი ამბობს რომ ეს შესაძლებელია, თუმცა გამოსავალიც არსებობს: ,,ნებისმიერ სიმინდს შეუძლია გადააშენოს სხვა ჯიშის სიმინდი, რადგან ეს კულტურა არის ჯვარედინად დამამტვერიანებელი და შესაძლებელია ერთმანეთი დაამტვერონ. მაგრამ თუ იზოლაციაში დაითესება, მინიმუმ 200-300 მეტრში, მაშინ ქართული სიმინდიც შენარჩუნდება''.
ახალციხის სასოფლო-საკონსულტაციო სამსახურში ამბობენ რომ ჰიბრიდული სიმინდის ჯიშზე მოთხოვნა დაბალია, თუმცა იმედოვნებენ რომ ინტერესი კულტურის მიმართ თანდათან გაიზრდება. აგრო- მაღაზია ,,ფერმერში''ერთი კგ. თესლი 15 ლარი ღირს. მისი მოსავლიანობა საშუალოდ 12 ტონაა, თუმცა სამცხე-ჯავახეთში ფერმერებმა წელს ცხრა ტონაზე მეტი ვერ მიიღეს.
 
მანანა სარაშვილი, ახალციხე