მწერები – ზაფხულის პრობლემა

 თამარ თოთაძე, ახალციხე

ტემპერატურის მატებასთან ერთად, მწერების რაოდენობაც გაიზარდა. რამდენად საშიშია სხვადასხვა მწერის ნაკბენი და როგორ დავიცვათ თავი ინფექციისგან.

 

საქართველოში გავრცელებულ სისხლისმწოველ მწერებს შორის ინფექციური დაავადების გადამტანებიც არიან. მწერების არსებობა განსაკუთრებით საშიშია მდინარის ნაპირებზე, ასევე იმ ადგილებში, სადაც ანტისანიტარიაა. მწერები სხვადსხვა ტრანსმისიური დაავადების გადამტანები არიან, მათ შორის: მალარიის, ლეიშმანიოზისა და ბორელოზის. ამიტომ, მოსახლეობა მათგან თავის დაცვას სხვადასხვა საშუალებებით ცდილობს.

“მდინარესთან ახლოს ვცხოვრობთ, ორი მცირეწლოვანი შვილი მყავს და ვცდილობთ თავი როგორმე დავიცვათ. მაგრამ, მაინც ხშირად კბენენ ბავშვებს”, - ამბობს ცხრა აპრილის ქუჩაზე მცხოვრები ქეთინო ნადირაძე.

ახალციხის რაიონული საავადმყოფოს ქირურგიულ განყოფილებაში ამბობენ, რომ მწერის ნაკბენით მათთვის არავის მიუმართავს.

“გველის დაგესვლის და ძაღლის დაკბენის შემთხვეები იყო, მაგრამ, ფუტკრის, მორიელის, ობობას, ან სხვა მწერის ნაკბენით არავინ მოსულა”, - ამბობს ახალციხის რაიონული საავადმყოფოს ქირურგიული განყოფილების უფროსი გიორგი გოგოტიშვილი.

სტატისტიკურად, არცერთი შემთხვევა არ არის დაფისქირებული სამცხე-ჯავახეთის საზოგადოებრივი ჯანმრთელობის დაცვის ცენტრშიც.

“ჩვენთან სტატისტიკური მონაცემები იყრის თავს, სად რამდენი შემთხვევაა დაფიქსირებული, რომელსაც სამედიცინო დაწესებულებები გვაწვდიან. ამ ეტაპზე არცერთი შემთხვევა არ არის შემოსული”, - ამბობს სამცხე-ჯავახეთის საზოგადოებრივი ჯანმრთელობის დაცვის ცენტრის უფროსი ფატი ხაბულიანი.

მწერების ნაკბენი შეიძლება ორ დიდ ჯგუფად დაიყოს: სიფრიფანაფრთიანთა (კოღოები, ფუტკრები, კრაზანები, ონავარები, ბუზანკალები და სხვა) და ობობასებრთა (ტარანტულები, მორიელები, ტკიპები) ნაკბენები.

სპეციალისტების განმარტებით, კოღოს ნაკბენი ყველაზე უსაფრთხოა. კოღოს ნაკბენმა შეიძლება გამოიწვიოს შეშუპება, ტკივილი და ქავილი. გარდა ამისა, ალერგიული რეაქციაც. ამ შემთხვევაში პაციენტმა აუცილებლად უნდა მიმართოს ექიმს, რადგან მას შეიძლება გართულება მოჰყვეს.

მწერები კბენისას კანქვეშ უშვებენ ნერწყვს, რომელიც ტოქსინსა და ანტიკოაგულანტს შეიცავს. ნაკბენი ადგილის გაღიზიანება და ძლიერი ქავილი სწორედ ნერწყვის მიმართ ორგანიზმის ალერგიის შედეგია. კოღოები ძირითადად დატბორილ წყალსატევებში, დატბორილ სარდაფებსა და გუბეებში ბინადრობენ. ისინი ადვილად აღწევენ ტანსაცმელშიც. მრავალრიცხოვანი სახეობებიდან ყველაზე საშიში ანიფელესიის გვარის კოღოა, რომელიც სანერწყვე ჯირკვლებში მძიმე ინფექციურ დაავადებას – მალარიის გამომწვევ პლაზმოდიუმს ინახავს.

ექიმები მწერის ნაკბენისაგან თავის დასაცავად სხვადასხვა მეთოდს გვირჩევენ. კოღოები და ბუზები ვერ იტანენ მკვეთრსუნიან ნივთიერებებს, ზოგიერთ არომატზე კი მწვავედ რეაგირებენ. სახლის პირობებში შესაძლებელია სხვადასხვა არომატით კოღოებისგან თავის დაცვა. მაგალითად, პომიდვრის ფოთლების მკვეთრი სუნი კოღოებს აფრთხობს. ასევე, მიხაკისა და ევკალიპტის სუნიც. კოღოებს აფრთხობს კატაბალახას, ახალმოწყვეტილი კაკლის ფოთლისა და თამბაქოს კვამლის სუნიც.