გილოცავთ დამდეგ შობა - ახალ წელს!

ამ წელში “სამხრეთის კარიბჭეს” ბოლო, ნომერი გამოვიდა. გაზეთის რედაქციის არქივში “სამხრეთის კარიბჭეს” 312 ნომერი ინახება, 312 ქართული და სომხური გაზეთი; 312 ნომრის სტატიები, ფოტოები, რესპონდენტების ხმები და მოსაზრებები; ცხადია, ყველა ნომერს და ყველა ფოტოს თავისი ისტორია აქვს, ისტორია იმის, როგორ მოვიდა ის თქვენამდე.

2004 წლის ივნისიდან, “სამხრეთის კარიბჭეს” დაარსებიდან, დღემდე, გვქონდა არაერთი პრობლემა; არაერთი უძილო, ნერვიული ღამე; არაერთხელ გათიშული შუქი ყველაზე გადამწყვეტ მომენტში;

არაერთი არასასიამოვნო ზარი;

...მუშაობა არ შეგვიწყვეტია... იმედს მუდამ თქვენ, ჩვენი და თქვენი გაზეთის, “სამხრეთის კარიბჭეს” მკითხველები გვაძლევდით...

მკითხველები, რომელთა ნაწილიც ყოველ ორშაბათს, ჯერ კიდევ “სამხრეთის კარიბჭეს” ქსელში გასვლამდე, რედაქციაში გვაკითხავდით გაზეთის წასაღებად და თუ ვინძლო გაზეთი დაგვიანდებოდა ან შეფერხდებოდა, ჩვენზე მეტად ღელავდით...

მადლობა ამ მუხტისთვის “სამხრეთის კარიბჭეს” ყველა მკითხველს და გულშემატკივარს; მადლობა ყველა ჩვენს რესპონდენტს, ხან რომ უხაროდათ და ხანაც სწყინდათ ჩვენი დანახვა; მადლობა ყველას, ვისაც თავისი წვლილი შეაქვს “სამხრეთის კარიბჭეს” არსებობაში.

გილოცავთ შობა-ახალ წელს!

დაე, ეს წელი ფეხბედნიერი ყოფილიყოს თითოეული თქვენგანის ოჯახში!

ბედნიერება არ გამოგლეოდეთ!

სასიხარულო დღეები მუდამ გქონოდეთ!

აბიტურიენტს  -სტუდენტობა!

ფეხმძიმეს – დედობა!

უმუშევარს –სამსახური!

მომსახურეს –მაღალი ხელფასი!

მსოფლიოს -  მშვიდობა!

ჩვენს გაზეთს - მრავალი მკითხველი და საჯარო ინფორმაციის გამცემი დაწესებულებები!

პლანეტას – სიყვარული!.

“სამხრეთის კარიბჭე” ერთი თვით, იანვრის ბოლომდე გემშვიდობებათ.

2011 წლიდან ჩვენ ისევ ვეცდებით ყოველ ორშაბათს რეგიონის ახალი, საინტერესო თუ პრობლემური ამბები გაგაცნოთ. მოგიყვეთ, როგორ ცხოვრობენ, რა უჭირთ და რა უხარიათ სამცხე-ჯავახეთში მცხოვრებთ. დღემდე ხომ სწორედ ეს იყო ჩვენი მთავარი ამოცანა. 

გილოცავთ დამდეგ 2011 წელს და ვიმედოვნებთ, ბედნიერი წელიწადი გვექნება! 

ორმო ტბის ნცვლად

ასეთი იყო ტბა ერთ დროს. ახლა ამ ადგილას დიდი ორმოა. 

ხანჩალის ტბის ორმოდ ქცეული ნაწილი, განადგურებული ბიომრავალფეროვნება, ასობით გადაშენებული თევზი, ფრინველი და ცხოველი, დაზიანებული ეკოსისტემა, შეცვლილი კლიმატი და საფრთხის წინაშე მყოფი მოსახლეობა.

საქართველოში ზომით მეოთხე ტბა, რომლის წყლის ზედაპირის ფართობი 1310 ჰექტარს შეადგენდა, გაქრობის პირასაა.

ხანჩალის ტბის სტატისტიკური მონაცემები ტბის დაშრობამდე

ფართობი (კმ2)		სიგრძე (კმ)		სიგანე (კმ)		სიღრმე (მ)		სიმაღლე ზღვის დონიდან (მ)		ტემპ. (0 C)		მდინარის აუზის ფართობი (კმ2)
13.1		7		2.5		0.7		1,928		10		176

ხანჩალის ტბა ქვეყნის სამხრეთ ნაწილში, ჯავახეთის ზეგანზე მდებარეობს. ეს გლობალური მნიშვნელობის ჭარბტენიანი ტერიტორიაა და უნიკალური ბიომრავალფეროვნებით ხასიათდება. 

ისტორია

ხანჩალის ტბისთვის პირველად საბჭოთა ეპოქაში “მოიცალეს”. 1961 წელს მთავრობამ გადაწყვიტა ხანჩალი ექსპერიმენტული თევზსაშენი მეურნეობისათვის გამოეყენებინა. ძირითადი სამუშაო 1963-64 წლებში ჩატარდა. ტბა წყლისაგან დაცალეს, გათხარეს თევზების გამოსაზამთრებელი არხები და მოაწყვეს წყლის დონის მარეგულირებელი სისტემა.

1964 წელს ტბა კვლავ აავსეს წყლით. მიუხედავად ამისა, ფრინველების სახეობების ნაწილმა გადაფრენის მარშრუტი შეცვალა და აქედან მოყოლებული ხანჩალზე აღარ ჩერდებოდა. ამავე წელს ტბაში ჩაასახლეს სარეწაო მნიშვნელობის თევზები. წამოწყება მომგებიანი აღმოჩნდა, მაგრამ 1968 წელს კვლავ გააუქმეს, ტბა ამოაშრეს და თევზი მთლიანად დაიღუპა. ამის შემდეგ ტბა გადაეცა საქსასთევზმრეწვს, რომელმაც ხანჩალი მალევე მიატოვა. ამან დადებითად იმოქმედა ტბაზე - ისევ გაივსო წყლით, ეკოსისტემამ თანდათანობით აღდგენა დაიწყო, მდინარეებით შემოვიდა და გამრავლდა თევზი, გაიზარდა ტბაზე მობუდარი და მიგრირებადი ფრინველების რაოდენობა.

თუმცა 1979 წელს ახალი ექსპერიმენტი წამოიწყეს, რომელიც ტბის ნაწილობრივ დაშრობასა და სასოფლო სამეურნეო სავარგულებად გამოყენებას გულისხმობდა.

იყო და არა იყო რა...

არაფერი პოლიტიკაზე, არაფერი პოლიტიკაზე, არაფერი პოლიტიკაზე, ვიმეორებდი გულში, მგონი ტუჩებსაც ვაცმაცუნებდი, ასეთი განწყობით მივუჯექი კომპიუტერს და სვეტის წერა დავიწყე.

12 წლამდე პირველი იანვრის დილას ბალიშის ქვეშ ყოველთვის მხვდებოდა საჩუქარი. მერე გავიგე, რომ თოვლის ბაბუა არ არსებობდა, ძალიან მეწყინა, ვიტირე. შემდეგ თეო იყო პატარა და წლები მას ვატყუებდით და ვუტოვებდით ბალიშის ქვეშ საჩუქრებს. თეოს, თოვლის ბაბუის არ არსებობა ჩემსავით მძიმედ არ გადაუტანია, რადგან მას ახლაც სჯერა ზღაპრების, მინდა რომ სულ სჯეროდეს!

ახლა მინდა, რომ ყველას სჯეროდეს ზღაპარების. არც მე მინდა ვიყო დედინაცვლის ბოროტი შვილი და არც რესპონდენტები მინდა მყავდეს კუდიანები.

ახლა ჩემს სვეტს კითხულობ და ფიქრობ, კარგი რაა! რა ზღაპრები! რის ზღაპრები! რას ბოდავ! მაგრამ ეს ჩემი საახალწლო სურვილია და მაცადეთ ოცნება!

რატომ არ თოვს ნეტავ?! თოვლიც ბავშვობაში დამრჩა, თუმცა მერე რა, რომ თოვლი არაა, დაანთეთ ბუხარი, ჩართეთ სასიამოვნო მუსიკა, დაჯექით იატაკზე, დაიდეთ გვერდზე ჭიქა ღვინო, მოწრუპეთ, უსმინეთ შეშის ტკაცა-ტკუცს და დაელოდეთ, ახალ წელს ხომ სასწაულები ხდება!

გულო კოხოძე