“მესხეთი” ბრძოლას თავიდან იწყებს

თამუნა უჩიძე, ახალციხე
უსახსრობა თუ სუსტი საფეხბურთო გუნდი; დაკარგული უმაღლესი ლიგა და მეორე მცდელობა პირველ ლიგაში; ახლად შეკრებილი “მესხეთი”; შედეგები და სამომავლო გეგმები;

ერთწლიანი პაუზის შემდეგ ახალციხის ცენტრალურ სტადიონზე საფეხბურთო კლუბი “მესხეთი” დაბრუნდა. საქართველოს ჩემპიონატის პირველ ლიგაში გუნდს სამი შეხვედრა უკვე ჰქონდა. პირველი გასვლითი თამაში ახალციხელებმა სამტრედიასთან 2:0 მოიგეს. მეორედ ხობში ითამაშეს და შეხვედრა მასპინძლების სასარგებლოდ, ანგარიშით 2:0, დასრულდა. მესამედ “მესხეთი” “ჭიათურას” სახლში ეთამაშა და აქაც დამარცხდა.

“უმაღლეს ლიგაში გადასვლის შანსი 50-50-ზე გვაქვს. ჯერ არაფერი დაგვიკარგავს. ახლა ჩვენი მთავარი მიზანი, პირველ ლიგაში ლიდერებს შორის ადგილის შენარჩუნებაა”, - აცხადებს “მესხეთის” მწვრთნელი პაატა გოგოლაძე.

ახლად შეკრებილი გუნდი ძირითადად ადგილობრივი კადრებით დაკომპლექტდა. 17-კაციდან უმრავლესობა ახალციხისა და ასპინძის მუნიციპალიტეტებიდანაა. მათ შორის მოწვეული მხოლოდ ოთხია.

“პირველად 15 ივლისს შევიკრიბეთ. სამი ფეხბურთელი გორიდან მაშინვე დავიმატეთ, შემდეგ ერთი კიდევ ჩამოვიყვანეთ - ამბობს გოგოლაძე და ამატებს, რომ გუნდის უმრავლესობა ძველი ფეხბურთელებისგან შედგება - მათი ნაწილი სხვა გუნდებში თამაშობდა, მაგრამ დაბრუნდა”.

“მესხეთი” ახალციხელი ბიზნესმენის ნიკა სარჯველაძის ფინანსური მხარდაჭერით აღდგა. ნიკას მამა, ასევე ბიზნესმენი ნუგზარ სარჯველაძე გუნდს გასულ წლებშიც აფინანსებდა.

“პატრიოტი ადამიანია. ყველანაირად გვერდში გვიდგას. გვაქვს ბურთები, ბუცები, სპორტულები, ფორმები. თავად ფარავენ გორიდან ჩამოსული ფეხბურთელების კვებისა და ბინის ხარჯებს. არ გვექმნება პრობლემა გასვლით თამაშებზე”, - გვიამბობს გოგოლაძე.

ნიკა სარჯველაძის ფინანსური მხარდაჭერით აღდგა განადგურებული მინდვრის საფარიც ქალაქის ცენტრალურ სტადიონზე: “რაც შეეხება გასახდელებსა და სხვა ინფრასტრუქტურას სტადიონზე, ჯერ-ჯერობით მოთხოვნებს აკმაყოფილებს. თუ უმაღლეს ლიგაში გადავალთ, სკამებს შევარემონტებთ”.

“მესხეთი” უმაღლეს ლიგას 2009 წლის მაისში გამოეთიშა.

“მაშინ მწვრთნელი არ ვიყავი, მაგრამ რამდენადაც ვიცი გუნდმა თამაშის გაგრძელება იმიტომ ვერ შეძლო, რომ  ფედერაციაში თამაშისათვის საჭირო თანხა ვერ გადარიცხა”, - გვიამბობს გოგოლაძე.

ფეხბურთელების უხელფასობაზე, კვებისა და აბანოს გამო აღებულ ვალებზე ესაუბრა მაშინ “სამხრეთის კარიბჭეს” გუნდის ყოფილი პრეზიდენტი გია მესხელი, რომელმაც “მესხეთი” სწორედ ფინანსური პრობლემების გამო დატოვა. მესხელი აცხადებდა, რომ იმჟამად გუნდისათვის სპონსორის მოძებნა ვერ მოხერხდა და გუნდის მდგომარეობაც ფინანსური შესაძლებლობების შესაფერისი დარჩა: “ნაყიდი ფეხბურთელები, ვინც ნორმალური იყო, ყველა სადღაც გადავიდა. მხოლოდ ისაა გუნდში, ვისაც არსად წასასვლელი აქვს” (18 მაისი 2009 წ. #16 (240)).

გუნდში არსებულ ფინანსურ პრობლემებს კატეგორიულად უარყოფს ნუგზარ სარჯველაძე: “მაშინ მე ვეხმარებოდი გუნდს. ვერ ითამაშეს, დააქვეითეს და გამოაგდეს, არანაირი ფინანსური პრობლემა არ ყოფილა”.

გუნდის მეკარე გელა ძამუნაშვილი “მესხეთში” ექვსი წელია თამაშობს. მისი თქმით, გუნდს ფინანსური პრობლემები ჰქონდა: “ცუდი თამაშის გამო არ გამოვარდნილვართ”.

უმაღლესი ლიგიდან გათიშვის შემდეგ გუნდმა ასპარეზობა კვლავ პირველ ლიგაში დაიწყო. 2009 წლის აგვისტოში გუნდი ნიკა სარჯველაძემ იყიდა, თუმცა, “მესხეთმა” ამჯერადაც ცოტახნით, მხოლოდ ერთი წელი იარსება. ერთწლიანი პაუზის შემდეგ კლუბს სათავეში კვლავ ნიკა სარჯველაძე ჩაუდგა. მისი განმარტებით, გუნდს ამჟამად სამწლიანი გეგმა აქვს შემუშავებული და ის ბავშვთა ფეხბურთის განვითარებასაც გულისხმობს.

გუნდის უმაღლეს ლიგაში თამაშისათვის პატარების ფეხბურთის განვითარების აუცილებლობაზე გოგოლაძეც საუბრობს: “ოთხი-ხუთი გუნდი მაინც უნდა იყოს პატარების, რომ ნელ-ნელა შემოემატნონ, თორემ წინ წასვლა გაგვიჭირდება. ახლა მხოლოდ ოთხი ახალგაზრდა გაყვს გუნდში, ერთი  ფეხბურთელის მოწვევას რუსთავიდან ვაპირებთ”.

სარჯველაძე იმედოვნებს, რომ თუ გუნდი უმაღლეს ლიგაში გადავა, შესაძლოა უცხოელი სპონსორიც გამოუჩნდეს. რაც შეეხება, ადგილობრივი თვიმმართველობიდან “მესხეთის” ფინანსურ მხარდაჭრას, ბოლოს, ახალციხის მუნიციპალიტეტის 2009 წლის ბიუჯეტიდან 120 000 ლარი გამოიყო.

“წლევანდელ ბიუჯეტში ყველა თეთრი მუხლობრივადაა გაწერილი. საშუალებაც რომ იყოს, მის დაფინანასებას იურიდიულ ჩარჩოებში ვერ მოვაქცევთ. თუ კეთილი ნება იქნება, შეიძლება ერთჯერადად, მაგალითად მგზავრობის ხარჯი დავუფაროთ, - აცხადებს ახალცხის მუნიციპალიტეტის გამგეობის საფინანსო-საბიუჯეტო განყოფილების უფროსი გაგა ივანიძე და ამატებს, რომ  ადგილობრივ თვითმმართველობას სახსრები, არც სტადიონის სარემონტოდ აქვს - “ეს ძვირადღირებული სიამოვნებაა, თან სტადიონი ეკონომიკის სამინისროს ბალანსზეა და მისი გარემონტება მხოლოდ თანადაფინანსებით შეიძლება შვძლოთ”.

ამჟამად გუნდი, 20 სექტემბრისთვის ტყიბულში სათამაშოდ ემზადება, 25-ში კი “ბათუმს” შეხვდება. რა შედეგებით დასრულდება “მესხეთის” ასპარეზობა პირველ ლიგაში მომავალი გვიჩვენებს. მანამდე კი იმედი უნდა ვიქონიოთ, რომ “მესხეთს” უმაღლეს ლიგაში გადასვლის შემთხვევაში, შესაფერისი მინდვრის საფარი და ინფრასტრუქტურა ექნება.