უსაფრთხოა თუ არა?

 თამარ თოთაძე, ახალციხე

მეორე წელია ახალციხის მოსახლეობის ნაწილი ბუნებრივ აირს მოიხმარს. ვინ ამონტაჟებს გაზის გამათბობლებს და რამდენად უსაფრთხოა ისინი.

დაზამთრებასთან ერთად საქართველოში ბუნებრივი აირით მოწამვლის შემთხვევებმა იმატა. გაზის გაჟონვისა და ბუნებრივი აირით მოწამვლის შემთხვევებმა ბოლო ორი წლის განმავლობაში პიკს მიაღწია. ცენტრალური არხებით გაზით ინტოქსიკაციის შემთხვევებზე ინფორმაცია თითქმის ყოველდღიურად ვრცელდება.

2010 წელს საქართველოში ინტოქსიკაცია 1161 ადამიანმა მიიღო, მათ შორის 13 ადამიანი გარდაიცვალა. მიმდინარე წელს კი ეს ციფრი 1191-მდე გაიზარდა, ამათგან, ხუთი გარდაიცვალა, 613 კი   დაშავდა (1TV.ge).  

ახალციხის რაიონულ საავადმყოფოში განმარტავენ, რომ ახალციხის მუნიციპალიტეტში, ბოლო ორი წლის განმავლობაში, ბუნებრივი აირის გაჟონვის შედეგად ინტოქსიკაციის შემთხვევები არ დაფიქსირებულა.

 

ბუნებრივი აირით გათბობა საკმაოდ ძვირი სიამოვნებაა.  გაზის სახლამდე მიყვანა 350-დან 600 ლარამდე ჯდება.

ცალკე თანხებია საჭირო გაზის გამათბობლის დასამონტაჟებლად. ბუნებრივი აირის გამათბობლის ფასი 400 ლარიდან იწყება და ზომისა და ფორმის მიხედვით იმატებს. ბინაში ცენტრალური გათბობის დასამონტაჟებლად კი 2 000 ლარამდეა საჭირო.

“თვეზე მეტია, რაც გაზის გამათბობელი დავამონტაჟეთ. ერთხელ გავიჭირვეთ და “კარმა” შევიძინეთ, სამაგიეროდ, მთელი წელი შეშის ღუმელს აღარ მოვიხმართ”, - ამბობს ახალციხეში მცხოვრები ნანა გოგოლაძე.

მოსახლეობის უმეტესობა, ვინც გასათბობად ბუნებრივ აირს მოიხმარს, დარწმუნებულია, რომ გამათბობელი უსაფრთხოდ მონტაჟდება.

ცხრა აპრილის ქუჩაზე მცხოვრები ვერა გელაშვილის ოჯახი მეორე თვეა ცენტრალური გათბობით სარგებლობს. გამათბობლის ყიდვა და დამონტაჟება, დაახლოებით, 2 000 ლარამდე დაუჯდათ, ერთი თვის გადასახადმა კი 120 ლარი შეადგინა.

დიასახლისი ამბობს, რომ როცა გათბობა დაამონტაჟეს, გაზის საქვაბე შპს “ელ-ენის” სპეციალისტს შეამოწმებინეს: “გამათბობლები ადრე უფრო საშიში იყო, საქართველოში წარმოებულ, ეგრეთ წოდებულ, “ნიკალას” გამათბობლებს, კუსტარულად ამონტაჟებდნენ და გაზის გაჟონვის შემთხვევებიც იყო. ახალი გამათბობლები გაცილებით უსაფრთხოა”.

შპს “ელ-ენის” მთავარი ინჟინერი ზაზა ზაზაშვილი ამბობს, რომ გაზმა შეიძლება გაუფრთხილებლობისა და გამათბობლის დაზიანების შემთხვევაში გაჟონოს. საბედნიეროდ, ახალციხეში ასეთი ფაქტი არ დაფიქსირებულა: “კარმას” დახურული წვის ღუმელი აქვს, თუ ღუმელი დაზიანებული არაა და გამართულადაა დამონტაჟებული, საკმაოდ უსაფრთხოა. იგივე შეიძლება ითქვას გამათბობელ ქვაბზეც, რომელიც წვისთვის საჭირო ჰაერს გარედან იღებს და ნამწვიც გარეთ გადის”.

შპს “ელ-ენში” განმარტავენ, რომ ქალაქში რამდენიმე კვალიფიციური და გამოცდილი მუშაა. მათ შესაბამისი კურსები აქვთ გავლილი გამათბობლების დამონტაჟებისა და უსაფრთხოების ნორმების შესახებ.

“აბონენტს შეუძლია თხოვნით მოგვმართოს და ჩვენი სპეციალისტი გამათბობელს ადგილზე შეამოწმებს. ასეთი შემთხვევები გვქონია, თუმცა ხშირად არა”, - ამბობს ზაზაშვილი და ამატებს, რომ ამ ეტაპზე კომპანია აბონენტების სისტემატიურ შემოწმებებს არ აწარმოებს. თუმცა, სამომავლოდ, პერიოდული შემოვლითი შემოწმებები და თითოეული აბონენტის გამათბობლის აღწერა იგეგმება. 

ამჟამად ახალციხეში ბუნებრივ აირს დაახლოებით 3 300 აბონენტი მოიხმარს, ამ რიცხვში შედის კომერციული ობიექტებიც. შპს “ელ-ენში” ამბობენ, რომ დაზამთრებასთან ერთად აბონენტების რაოდენობამაც მოიმატა.

ქალაქის ცენტრალური ნაწილის გაზიფიცირება ფაქტობრივად, დასრულებულია, მხოლოდ საბარგო სადგურისა და რაბათის დასახლებაა დარჩენილი. გაზის კომპანიაში განმარტავენ, რომ ქალაქის სრული გაზიფიცირება 2012 წლის ბოლომდე დასრულდება. ამის შემდეგ დაიწყება გაზის შეყვანა სოფლებში.