“მარტივი და მეგობრული გამოცდების” მეორე წელი

2012 წლის საატესტატო გამოცდებისთვის ბარიერი ყველა საგანში 5,5 ქულით განისაზღვრა. ატესტატის მისაღებად მოსწავლეები გამოცდას ისევ რვა საგანში ჩააბარებენ.

2011 წელს საქართველოში საატესტატო გამოცდები ეგრეთ წოდებული ჩAთ-ის სისტემით ჩატარდა. აღნიშნული სისტემის მიხედვით, მოსწავლეებმა გამოცდა კომპიუტერის საშუალებით ჩააბარეს. გასულ წელს გამსვლელი ბარიერი გამოცდების დასრულების შემდეგ დადგინდა.

იმის გამო, რომ შარშან საატესტატო გამოცდები პირველად ტარდებოდა, საქართველოს განათლებისა და მეცნიერების სამინისტრომ გარკვეული შეღავათები დააწესა. მოსწავლე, რომელიც რვა საგნიდან ნებისმიერ სამში 5,2-ს, ხოლო დანარჩენ ხუთში 5,5 ქულაზე მეტს დააგროვებდა, ატესტატს მიიღებდა.

განათლებისა და მეცნიერების მინისტრის, დიმიტრი შაშკინის გადაწყვეტილებით, წელს მსგავსი შეღავათები აღარ იქნება. უკვე დადგენილია, რომ 2012 წლის საატესტატო გამოცდებზე გამსვლელი ბარიერი ყველა საგანში 5,5 იქნება, გამონაკლისია არაქართულენოვანი სკოლების ქართული ენის გამოცდა, აქ ბარიერი 5,3 –ით განისაზღვრა.  

 

გამოცდებისთვის მოსწავლეთა რეგისტრაცია უკვე დაწყებულია. სკოლის დირექტორები გამოცდების ეროვნული ცენტრის ვებ-გვერდზე, ონლაინ რეჟიმში ჯერ სკოლას, შემდეგ კი თითოეულ მოსწავლეს არეგისტრირებენ.  

“რეგისტრაცია 24 მარტს მთავრდება. რეგისტრაციის დასრულებამდე ხუთი დღით ადრე მოსწავლეთა სია უნდა ამოვბეჭდოთ, დავამოწმოთ ბეჭედით და თითოეული მოსწავლის ხელმოწერით, რომ ნამდვილად დარეგისტრირდნენ გამოცდებისთვის და გავაგზავნოთ სამინისტროში, ამით დამთავრდება რეგისტრაციის პროცედურა”, - გვიხსნის ახალციხის პირველი საჯარო სკოლის დირექტორი მაკა ჯანაშვილი.

საატესტატო გამოცდებისთვის რეგიტრაციას ის მოსწავლეებიც გადიან, ვინც გამოცდების ჩაბარებას ექსტერნად აპირებს. გარდა ამისა, მოსწავლეები, რომლებმაც გასულ წელს ბარიერი რომელიმე საგანში ვერ გადალახეს, წელს გამოცდას განმეორებით მხოლოდ ამ საგანში ჩააბარებენ.

გასულ წელს ახალციხის მეორე საჯარო სკოლის 49 მეთორმეტეკლასელიდან სკოლის დამამთვავრებელი ატესტატი რვა მოსწავლემ ვერ მიიღო. თითოეულმა მათგანმა გამოცდა მხოლოდ ერთ საგანში ვერ ჩააბარა.

წელს მეორე საჯარო სკოლას 58 მოსწავლე ამთავრებს. მათ შორის 22 რუსულ სექტორზე, ხოლო 36 ქართულ სექტორზე სწავლობს. სკოლის დირექტორის მარინა ზედგინიძის თქმით, წელს სკოლას საკმაოდ კარგი ნაკადი ამთავრებს.

“მეთორმეტე კლასში ოთხი ოქროს მედალოსანი და ორი ვერცხლის მედალოსანი გვყავს. ეს ის ბავშვები არიან, რომლებიც პირველი კლასიდან ძალიან კარგად სწავლობენ, - ამბობს მარინა ზედგინიძე და ამატებს, რომ ტესტი მოსწავლის ცოდნის მაჩვენებელი არაა: კი, მცოდნე ბავშვი მეტ სწორ პასუხს შემოხაზავს, მაგრამ, მანდ ინტუიციის ამბავია, შეიძლება საერთოდ არ იცოდე და სწორ პასუხს “მოარტყა”.

შარშან, პირველ საჯარო სკოლაში, 99 მეთორმეტეკლასელიდან ატესტატის გარეშე სამი მოსწავლე დარჩა. წელს საატესტატო გამოცდებს 110 მოსწავლე ჩააბარებს. მათ შორის, ორი ექსტერნად.  

მაკა ჯანაშვილის თქმით, გასულ წელს მოსწავლეებმა კარგი შედეგები აჩვენეს და სკოლისთვის მიღებული ცხრა ვარსკვლავიც ამის შედეგია: “ტექნიკურადაც გამართული იყო ყველაფერი და არანაირი ხარვეზი არ ყოფილა. წელს უფრო მომზადებულები ვართ, კამერები უკვე დამონტაჟებულია, კომპიუტერებიც წესრიგშია”.

საატესტატო გამოცდების შემოღებას გასულ წელს მოსწავლეები სხვადასხვა ფორმით აპროტესტებდნენ. მეთორმეტეკლასელები ამბობდნენ, რომ საატესტატო გამოცდებისთვის მოსამზადებლად ერთი წელი საკმარისი არ იყო და “აბიტურის საათებით” მთელ პროგრამას ვერ გაიმეორებდნენ. მართალია გამოცდებს წელს უფრო მომზადებულები ხვდებიან, მაგრამ, უმეტესობა ამბობს, რომ საბუნებისმეტყველო საგნების ჩაბარება შედარებით გაუჭირდებათ.

“ჩვენ მოვყევით საპილოტე ჯგუფში, როცა ქიმია და ფიზიკა ტრიმესტრულად ისწავლებოდა. ამიტომ, განსაკუთრებით საბუნებისმეტყველო საგნების ჩაბარების გვეშინია”, - ამბობს პირველი საჯარო სკოლის მეთორმეტე კლასის მოსწავლე ბექა ვანაძე.

ნინო მელიქიძე მხოლოდ იმ საგნებში ემზადება, რომელიც ერთიანი ეროვნული გამოცდების ჩასაბარებლად სჭირდება. თუმცა, ამბობს, რომ “აბიტურის საათის” მეშვეობით წლების განმავლობაში განვლილ მასალას იმეორებენ და ეს ასე თუ ისე მაინც ეხმარებათ: “ფიზიკის გამოცდის მეშინია, მაგრამ მაინც ვფიქრობ, რომ ბარიერს ამ საგანშიც გადავლახავ. მაქვს მსგავსი ტესტები, რომლებიც სავარაუდოდ იქნება საატესტატო გამოცდზე და ვმეცადინეობ”.

2011-2012 სასწავლო წელი 18 მაისს დასრულდება,   საატესტატო გამოცდები სავარაუდოდ 21 მაისს დაიწყება. გამოცდები ორი კვირის განმავლობაში საქართველოს ყველა საჯარო და კერძო სკოლაში ჩატარდება.

თამარ თოთაძე, ახალციხე