გართულებების თავიდან ასაცილებლად

 საახალწლო სუფრა, ზედმეტი კვება, ზომაზე მეტი ალკოჰოლი და ამ ყველაფრით გამოწვეული გართულებები.

ქართული ტრადიციებიდან გამომდინარე, საახალწლო სუფრა ყველა ოჯახში სავსეა ტკბილეულით, ხორცეულითა თუ ცომეული საჭმელებით.

“მაღალკალორიული და ცხიმიანი საკვების, ასევე დიდი რაოდენობით ალკოჰოლის მიღება კუჭს ტვირთავს და მონელება ფერხდება”, - ამბობს ექიმი თერაპევტი თეა ფერიაშვილი. 

 

მისი თქმით, ნორმალური კვების პირობებში საკვები კუჭსა და ნაწლავებში 24-დან 48 საათზე მეტ ხანს არ უნდა ჩერდებოდეს: “თხიერი საკვების მონელება კი 2 საათში უნდა ხდებოდეს. მაგრამ, როცა რეჟიმით არ ვჭამთ და ზომაზე მეტ საკვებს ვღებულობთ, თუნდაც მცირე ულუფებით, კუჭის მჟავიანობა ირღვევა და საკვები უფრო მეტხანს ჩერდება კუჭში”. 

ამან შეიძლება გამოიწვიოს კუჭის ანთება, გასტრიტი, ასევე შესაძლოა მოჰყვეს ეროზიული გართულებებიც მომავალში.

“განსაკუთრებით საშიში საახალწლო სუფრაზე, ჩვენ მხარეში პოპულარული სუჯუხი და ბასთურმაა. ეს არის წიწაკითა და სანელებლებით შეზავებული დაუმუშავებული ხორცი, - ამბობს ფერიაშვილი და ამატებს, რომ ამგვარი საკვების მიღებისგან მით უფრო მაშინ უნდა შევიკავოთ თავი, თუ ის საოჯახო პირობებშია მომზადებული – თერმულად არ მუშავედება, კუჭს ძალიან ტვირთავს და შესაძლოა კუჭის წყლულითაც დაავადდე”.   

არა ერთ ოჯახში, მით უფრო სოფლებში საახალწლოდ იკვლება ღორი.

“ბევრი ღორის ხორცის მიღება, მით უფრო ცხიმიანის, ქოლეცისტიტს იწვევს”, - გვიხსნის ფერიაშვილი.

თითქმის ყველა საახალწლო სუფრაზეა დანიგვზული კონსერვირებული ბადრიჯანი. ფერიაშვილის თქმით, მით უფრო ახალი წლის დღეებში, გადატვირთულ კუჭზე, მისი მიღება არასასურველია: “კონსერვირებულ ბადრიჯანს დაკარგული აქვს კვებითი ღირებულებები, ამდენად ის არც არის ვიტამინიზირებული. ძალიან აღიზიანებს კუჭნაწლავს და იწვევს ბუტულიზმს”.

მისი განმარტებით, დანიგვზული ბადრიჯანი განსაკუთრებით ნაღვლის ბუშტს აღიზიანებს: “ვისაც ნაღვლის ბუშტი აწუხებს უნდა მოერიდონ გოზინაყისა და საცივის მირთმევასაც”.  

ფერიაშვილის განმარტებით, არაა რეკომენდირებული კიტრისა და პომიდვრის მირთმევაც: “ამ დროისთვის კიტრიცა და პომიდორიც სათბურებში ნიტრატებითა და სასუქებითაა მოყვანილი”.

ახალი წლის დღეებში რთულია აარიდო თავი ალკოჰოლურ სასმელებსაც.

“ასეთ შემთხვევაში, ვისაც გულ-სისხლძარღვთა დაავადებები აქვს, დიდია თრომბისა და ინფარქტის რისკი. ეგრეთ წოდებული პახმელიის დროს ვიწროვდება სისხლძარღვები და იზრდება იშემიის ალბათობაც. ზედმეტმა ალკოჰოლმა შეიძლება გამოიწვიოს გასტრიტი და კოლიტიც”, - გვიხსნის ფერიაშვილი.

თუ ახალი წლის დღეებში ვერ ვაკონტროლეთ თავი და კუჭი გადაგვეტვირთა, მონელებაში დასახმარებლად შეიძლება მივიღოთ ფერმენტები: “ასეთებია მეზინფორტე და ენზალი. თუმცა, ამ წამლების დალევა ექიმის გარეშე არ არის მიზანშეწონილი. უმჯობესია, თუ მივიღებთ მეტ ბოსტნეულს, ხილს და წვნიანსაც შევაშველებთ”.

ახალი წლის შემდეგ სასურველია მოვაწყოთ განტვირთვის დღეები.

“კვირაში ერთი დღე ერთი სახის პროდუქტი უნდა მივიღოთ, მაგალითად იოგურტი, მაწონი, ვაშლი. ან შეიძლება გავაკეთოთ შერეული განტვირთვის დღე - ხაჭო და მაწონი, ან ხაჭოOდა 200 გრამი მოხარშული, მშრალი, საქონლის ხორცი ცხიმის გარეშე”, - გვირჩევს ფერიაშვილი.

თამუნა უჩიძე, ახალციხე