“სამოქალაქო განათლებისა და პედაგოგთა გადამზადების პროგრამაში” სამცხე-ჯავახეთის საჯარო სკოლებიც ჩაერთვნენ.
სამოქალაქო განათლებისა და პედაგოგთა გადამზადების სამწლიან პროგრამა წარმოადგენს ამერიკის შეერთებული შტატების საერთაშორისო განვითარების სააგენტოსა (USAID) და PH International-ის (პროექტი ჰარმონია) ერთობლივ ინიციატივას.
პროგრამის ფარგლებში დაგეგმილია ისეთი აქტივობები, როგორიცაა სამოქალაქო განათლების დამხმარე სასწავლო მასალების შექმნა, სამოქალაქო განათლების პედაგოგთა გადამზადება, მცირე გრანტები მოსწავლეთათვის, სტაჟირება ადგილობრივ თვითმმართველობებში, მედია-საშუალებებში, სამოქალაქო განათლების პედაგოგთა წახალისება, საუკეთესო პედაგოგების ყოველწლიური გამოვლენა და დაჯილდოება, ბიბლიოთეკების დაარსება საგანმანათლებლო რესურსცენტრებში, სოციალურ ქსელებში ტრეინინგები როგორც პედაგოგებისთვის ასევე მოსწავლეებისთვის, საზაფხულო ბანაკებისა და სამოქალაქო კლუბების შექმნა სკოლებში.
ერთ-ერთი რეგიონი, სადაც აღნიშნული პროექტი განხორციელდება სამცხე-ჯავახეთია. რეგიონიდან 41 საჯარო სკოლა შეირჩა. მათ შორისაა ახალციხის პირველი საჯარო სკოლაც.
“განსაკუთრებით მომეწონა მოსწავლეთათვის მცირე გრანტების პროგრამა. ჩვენს სკოლას ადრეც უმუშავია ამ მიმართულებით და შეიძლება ითქვას, რომ წარმატებულად დასრულდა”, - ამბობს პირველი საჯარო სკოლის დირექტორი მაკა ჯანაშვილი.
პროექტის მხარდამჭერი ორგანიზაცია სამცხე-ჯავახეთში ახალციხის ახალგაზრდული ცენტრი იქნება.
“თავდაპირველად, მივალთ სკოლებში, გავაცნობთ ამ პროექტს, მოხდება ინტერესებისა და შესაძლებლობების კვლევა და შემდგომში დაიწყება კონკრეტული ღონისძიებები”, - ამბობს ახალციხის ახალგაზრდული ცენტრის დირექტორი მარინე სუდაძე.
No comments:
Post a Comment
დატოვე კომენტარი