 |
| სასმელი წყლის ავზი სოფელ პამაჯში, რომელც ამ პროგრამის ფარგლებში გაკეთდა. |
“სოფლის დახმარების პროგრამის” ფარგლებში დაგეგმილ პროექტებზე მეხუთე თვეა მუშაობენ. მუნიციპალიტეტის მასშტაბით გამოკვეთილი 78 პრიორიტეტის მიხედვით ჩასატარებელი სამუშაოების დიდი ნაწილი დასრულებულია. მაგალითად, პირველი ივლისისთვის დასრულდა საყუნეთში ამბულატორიის ოთახის სარემონტო სამუშაოები, 20 ივლისისთვის დაამთავრეს ზიკილიაში სარწყავი არხის რეაბილიტაცია. ივნისში დაასრულეს ქალაქ ვალეში კულტურის სახლის სახურავის შეკეთება.
“სოფლის პროგრამის ფულით რომ კულტურის სახლს ხურავდნენ ვიცი, მაგრამ რა თანხა იყო გამოყოფილი და კიდევ რა კეთდება ვერ გეტყვით. რიტუალების სახლს თუ მოგვიწყობენ, არ იქნება ცუდი”, - ამბობს ვალეში მცხოვრები ელდარ გოზალიშვილი.
სოფელ ტყემლანაში, როგორც ადგილობრივი 86 წლის თენგიზ ხმალაძე ამბობს, პრიორიტეტის გამოსავლენად კრება არ ჩატარებულა: “სოფლის რწმუნებული ჩაუდგა ამ საქმეს სათავეში და ძველი რიტუალების სახლი რემონტდება. ისეთი დანგრეული იყო, კაცი შიგ ვერ შევიდოდა. მშენებლობა ჯერ არ დასრულებულა, სოფლისთვის კარგი საქმე კეთდება”.
ახალციხის მუნიციპალიტეტის 46 სოფლიდან 26-სთვის პრიორიტეტი რიტუალების სახლი აღმოჩნდა. იქ, სადაც გასულ წლებში რიტუალების სახლი ააშენეს, წელს ინვენტარის შეძენა სურთ. მაგალითად, საყუნეთში, პრიორიტეტებს შორის ერთ-ერთი, რიტუალების სახლისათვის 700 ლარად “დინამიკების” შეძენაა. აგარაში კი რიტუალების სახლზე 5 510 ლარით სამზარეულოს მიშენება უნდათ.
შემდგომი პრობლემა სოფლებისთვის სასმელი წყალია. მიმდინარე წელს ეს საკითხი 18 სოფელში სრულად თუ არა, ნაწილობრივ მაინც გადაიჭრება. რვა სოფლისთვის კი პრიორიტეტი სარწყავი სისტემის მოწესრიგება აღმოჩნდა. მაგალითად, სოფელ აწყურში გაწერილ რვა პრიორიტეტს შორის, სამი სასმელი წყლის და ორი სარწყავი არხის რეაბილიტაციაა.
ფრაქცია “ნაციონალური მოძრაობის” თავმჯდომარესა და ახალციხის მუნიციპალიტეტის საკრებულოს წევრს მარინე სუდაძეს მიაჩნია, რომ სოფლებში თანხა ყოველთვის მიზნობრივად არ იხარჯება: “როცა სოფელში პრიორიტეტად გზის მოხრეშვას ასახელებენ, უბრალოდ, ვერ წარმოუდგენიათ, რომ ძლიერი წვიმები მათი ერთი წლის ფულს ხრამში ჩაიტანს. მაგრამ ჩვენ ჩარევისა და პრიორიტეტის განსაზღვრის უფლება არ გვაქვს”.
წელს შიდა გზების მოხრეშვა სამ სოფელში დაიგეგმა. სამუშაოების დიდი ნაწილი შესრულებული ანში. ამ მიმართულებით 5 093 ლარის სამუშაოები დასრულდა წყორძაში. გზის მოხრეშვა დამთავრდა მუგარეთშიც. შიდა გზებისთვის აქ გამოყოფილი 8 184 ლარია.
დაგეგმილი 78 პრიორიტეტიდან რამდენიმე მათგანის განხორციელება ჯერ არ დაწყებულა.
“სასოფლო სამეურნეო სავარგულები გვიშლის ხელს. ამა თუ იმ პროექტის განხორციელებისას მათი ნაწილი შესაძლოა დაზიანდეს, ამიტომ ჯერ თავს ვიკავებთ”, - აცხადებს ახალციხის მუნიციპალიტეტის გამგებელი გელა დემეტრაძე.
გამგებლის განცხადებით, მიმდინარე წელს ყველა პროექტს ადგილობრივი მშენებარე ფირმები ახორციელებენ: “მათი უმრალვსეობა ინდივიდუალური მეწარმეცაა, ანუ ხელშეკრულებას ვაფორმებთ გადასახადის გადამხდელ ფიზიკურ პირებთან სოფლებში, ვისაც ამ მიმართულებით მუშაობის გამოცდილება აქვს. დასაქმებულიებიც მხოლოდ ადგილობრივები არიან”.
არასამთავრობო ორგანიზაცია “დემოკრატ მესხთა კავშირი” “სოფლის დახმარების პროგრამის” მონიტორინგს ორი წელია ახორციელებს. აღნიშნული ორგანიზაციის წარმომადგენელი გიორგი ანდღულაძე ამბობს, რომ მიმდინარე წელს, გასულ წლებთან შედარებით, ფული უფრო ეფექტურად იხარჯება: “სოფლებისთვის გამოყოფილი თანხა რეალურად დიდი პრობლემის მოგვარებას ვერცერთ თემში ვერ წვდება,
მაგრამ ზოგიერთმა სოფელმა გრძელვადიანი გეგმა გაწერა. დიდი პრობლემების მოგვარება ნაწილ-ნაწილ დაიწყო. სამომავლოდ კი, საერთო საკითხის გადასაწყვეტად, რამდენიმე სოფელი გაერთიანდება”.
რაც შეეხება სოფლებში პროექტების მიმდინარეობისას მოსახლების ჩართულებას, ანდღულაძის განცხადებით ადგილობრივები კვლავ ინერტულები არიან: “ამბობენ,
არ ვიცით რა კეთდება და მისი კონტროლის უფლებას ვინ მოგვცემსო, მაგრამ ვინ უშლით?! ეს სოფლის ფულია და ნებისმიერს აქვს უფლება დაინტერესდეს როგორ იხარჯება”.
მიმდინარე წელს ახალციხის მუნიციპალიტეტში 538 983 ლარი დაიხარჯება.
No comments:
Post a Comment
დატოვე კომენტარი